அறுவை சிகிச்சைக்கு பிறகு உத்தவ் தாக்கரே ஆஸ்பத்திரியில் இருந்து வீடு திரும்பினார்

மும்பை, 

அறுவை சிகிச்சைக்கு பிறகு முதல்-மந்திரி உத்தவ் தாக்கரே ஆஸ்பத்திரியில் இருந்து வீடு திரும்பி உள்ளார்.

முதல்-மந்திரி உத்தவ் தாக்கரே கழுத்து வலியால் அவதி அடைந்து வந்தார். எனவே அவர் கடந்த மாதம் 10-ந் தேதி மும்பையில் உள்ள ரிலையன்ஸ் ஆஸ்பத்திரியில் சிகிச்சைக்காக அனுமதிக்கப்பட்டார். 12-ந் தேதி அவருக்கு முதுகுதண்டு அறுவை சிகிச்சை மேற்கொள்ளப்பட்டது. அதன்பிறகு அவர் ஆஸ்பத்திரியில் தங்கி சிகிச்சை பெற்று வந்தார்.

இந்தநிலையில் அவர் 22 நாட்களுக்கு பிறகு ஆஸ்பத்திரியில் இருந்து வீடு திரும்பி உள்ளார். இதுகுறித்த தகவலை முதல்-மந்திரி அலுவலகம் வெளியிட்டுள்ளது. அதில், "முதல்-மந்திரி உத்தவ் தாக்கரே ரிலையன்ஸ் ஆஸ்பத்திரியில் இருந்து இன்று (நேற்று) டிஸ்சார்ஜ் செய்யப்பட்டார். அடுத்த சில நாட்களுக்கு உத்தவ் தாக்கரேயை வீட்டில் இருந்தபடி வேலை செய்யுமாறு அறிவுறுத்தி இருப்பதாக ரிலையன்ஸ் ஆஸ்பத்திரி டாக்டர் அஜித் தேசாய் கூறியுள்ளார்" என கூறப்பட்டுள்ளது.

முதல்-மந்திரி உத்தவ் தாக்கரே கலந்து கொள்ளும் வகையில் நாக்பூரில் நடைபெறும் சட்டசபை குளிர்கால கூட்டத்தொடர் மும்பைக்கு மாற்றப்பட்டுள்ளது குறிப்பிடத்தக்கது. 

குளிர்கால கூட்டத்தொடர் வருகிற 22-ந் தேதி முதல் 28-ந் தேதி வரை நடைபெற உள்ளது. முதல்-மந்திரி உத்தவ் தாக்கரே விமானப்பயணம் மேற்கொள்ள வேண்டாம் என டாக்டர்கள் அறிவுறுத்தி உள்ளனர்.