குரங்கணி மலைப்பகுதியில் முதியவர் பிணம்

போடி:

போடி அருகே குரங்கணி மலைப்பகுதியில், முட்டைக்கோஸ் என்ற இடத்தில் உள்ள தனியார் தோட்டத்தில், 60 வயது முதியவர் ஒருவர் நிர்வாண நிலையில் பிணமாக கிடந்தார். இதுகுறித்து தகவல் அறிந்த குரங்கணி போலீசார், சம்பவ இடத்துக்கு விரைந்து சென்றனர். 

பின்னர் முதியவரின் உடலை கைப்பற்றி பிரேத பரிசோதனைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர். ஆனால் அவர் யார்? எந்த ஊரை சேர்ந்தவர்? என்று தெரியவில்லை. 

இது தொடர்பாக போலீசார் வழக்குப்பதிவு செய்து விசாரணை நடத்தினர். விசாரணையில், பிணமாக கிடந்த முதியவர் கடந்த சிலதினங்களாக முந்தல் பகுதியில் 2 பேருடன் சுற்றித்திரிந்தது தெரியவந்தது. அப்பகுதியில் மழை பெய்ததால், அவர்கள் 3 பேரும் அங்குள்ள குடிசைக்குள் போய் அமர்ந்து இருந்துள்ளனர். 

இதனைக்கண்ட அப்பகுதி மக்கள் அவர்களை அங்கிருந்து விரட்டி விட்டனர். இந்த சூழ்நிலையில் தான், முதியவர் நிர்வாண நிலையில் பிணமாக கிடந்துள்ளார். ஆனால் அவர் சாவுக்கான காரணம் தெரியவில்லை. அவருடன் சுற்றித்திரிந்த 2 பேர் பற்றி போலீசார் விசாரித்து வருகின்றனர். 

இதற்கிடையே பிரேத பரிசோதனை அறிக்கை கிடைத்த பிறகு தான், முதியவர் சாவுக்கான காரணம் தெரியவரும் என்று போலீசார் தெரிவித்தனர்.