கார் கவிழ்ந்து கல்லூரி மாணவர் பலி

தளவாய்புரம், 

ராஜபாளையம் அருகே கார் கவிழ்ந்ததில்  சினிமா பார்க்க காரில் சென்ற கல்லூரி மாணவர் பலியானார். மேலும் அவரது 2 நண்பர்கள் காயம் அடைந்தனர்.

தென்காசி மாவட்டம் சிவகிரி அருகே உள்ள அருளாட்சி கிராமத்தை சேர்ந்த முத்துச்சாமி மகன் சசி (வயது 20). இவர் சிவகிரியில் உள்ள தனியார் பாலிடெக்னிக் கல்லூரியில் படித்து வந்தார். இந்தநிலையில் இவர் நேற்று முன்தினம் இரவு தனது நண்பர்களான அரவிந்த்(24), ராஜதுரை (21) ஆகியோருடன் வாடகைக்கு கார் ஏற்பாடு செய்து ராஜபாளையத்தில் உள்ள சினிமா தியேட்டருக்கு படம் பார்க்க சென்றனர். 

அந்த காரை சிவகிரி பகுதியை சேர்ந்த டிரைவர் விசுவநாத பிரசாத் (31) என்பவர் ஓட்டினார். படம் பார்த்து முடித்து விட்டு நள்ளிரவு 1:30 மணிக்கு தங்களது ஊருக்கு காரில் திரும்பிக் கொண்டிருந்தனர். 

கார் சேத்தூர் அருகே சோலைசேரி கம்மாக்கரை வளைவில் சென்றபோது நாய் ஒன்று குறுக்கே வந்துள்ளது.

 இதனை பார்த்த கார் டிரைவர் காரை திருப்பியபோது கார் கட்டுப்பாட்டை இழந்து கவிழ்ந்து, உருண்டது. இதில் கல்லூரி மாணவர் சசி, காரிலிருந்து வெளியே தூக்கி வீசப்பட்டு சம்பவ இடத்திலேயே  பரிதாபமாக உயிரிழந்தார். 

காரில் இருந்த அவரது நண்பர்களான அரவிந்த், ராஜதுரை ஆகியோர் லேசான காயம் அடைந்தனர். இதுபற்றி சேத்தூர் புறநகர் போலீசாருக்கு தகவல் தெரிவிக்கப்பட்டது. 

இதனை அடுத்து ஆம்புலன்ஸ் வரவழைக்கப்பட்டு சசியின் உடல் ராஜபாளையம் அரசு மருத்துவமனைக்கு பிரேத பரிசோதனைக்காக கொண்டு செல்லப்பட்டது. இதுகுறித்து போலீசார் வழக்குப்பதிவு செய்து கார் டிரைவர் விசுவநாத பிரசாத்தை கைது செய்து விசாரணை நடத்தி வருகின்றனர்.