சுரண்டையில் கல்லூரி மாணவர்கள் ஆர்ப்பாட்டம்

சுரண்டை:

நெல்லை மனோன்மணியம் சுந்தரனார் பல்கலைக்கழகத்திற்கு உட்பட்ட கல்லூரிகளில் மாணவ-மாணவிகளுக்கு செமஸ்டர் தேர்வுகளுக்கான ஏற்பாடுகள் நடந்து வருகிறது. இந்த நிலையில் கடந்த ஆண்டை போல் இந்த ஆண்டும் தேர்வுகள் அனைத்தையும் ஆன்லைனில் நடத்த வேண்டும் என வலியுறுத்தி, சுரண்டை காமராஜர் அரசு கலைக்கல்லூரி மாணவர்கள் நேற்று காலை வகுப்புகளுக்கு செல்லாமல் புறக்கணித்து ஆர்ப்பாட்டத்தில் ஈடுபட்டனர். தகவல் அறிந்ததும் சுரண்டை போலீஸ் சப்-இன்ஸ்பெக்டர் விமலா மற்றும் போலீசார் அங்கு வந்து மாணவர்களிடம் பேச்சுவார்த்தை நடத்தினர். இதையடுத்து அனைவரும் அங்கிருந்து கலைந்து சென்றனர்.