முருகன் கோவில்களில் சூரசம்ஹாரம்

அச்சன்புதூர்:

தென்காசி மாவட்டத்தில் உள்ள முருகன் கோவில்களில் சூரசம்ஹாரம் நேற்று நடந்தது. இதில் திரளான பக்தர்கள் கலந்து கொண்டனர்.

தென்காசி அருகே உள்ள ஆய்க்குடி பாலசுப்பிரமணிய சுவாமி கோவிலில் கந்தசஷ்டி திருவிழா கடந்த 4-ந் தேதி கொடியேற்றத்துடன் தொடங்கியது. விழா நாட்களில் பகல் மற்றும் இரவில் பல்வேறு வாகனங்களில் சுவாமி வீதி உலா, தீபாராதனை நடைபெற்றது. 

6-ம் திருநாளான நேற்று சூரசம்ஹார நிகழ்ச்சி ஆய்க்குடி சிவன் கோவில் மைதானத்தில் நடைபெற்றது. இதில் மகாசூரன், சிங்கமுகசூரன், ஆனைமுகசூரன் ஆகிய 3 அசுரர்களை முருகபெருமான் வதம் செய்தார்.  

விழாவில் திரளான பக்தர்கள் கலந்து கொண்டு சாமி தரிசனம் செய்தனர்.

பாவூர்சத்திரம் வென்னிமலை முருகன் கோவிலில் கந்தசஷ்டி விழா கடந்த 4-ந்தேதி கொடியேற்றத்துடன் தொடங்கியது. தொடர்ந்து தினமும் காலை, மாலையில் சிறப்பு பூஜைகள் நடந்தது. நேற்று சூரசம்ஹாரத்தை முன்னிட்டு கும்ப ஜெபம், மூலமந்திர ஹோமம், யாகசாலை பூஜை, சஷ்டி ஹோமம், சிறப்பு அபிஷேகம், தீபாராதனை உள்ளிட்டவை நடந்தது.

பின்னர் மாலை 6 மணிக்கு சூரனை சுவாமி வதம் செய்யும் நிகழ்ச்சி நடந்தது. அதன்பிறகு மகா பூர்ணாஹூதி, கும்ப அபிஷேகம், தீபாராதனை நடைபெற்றது. விழாவில் திரளான பக்தர்கள் கலந்து கொண்டனர்.

இன்று (புதன்கிழமை) இரவு சுவாமி-அம்பாள் திருக்கல்யாணம் நடைபெறுகிறது. 

செங்கோட்டை அருகே உள்ள பண்பொழி திருமலைக்குமாரசுவாமி கோவிலில் கந்தசஷ்டி திருவிழா கடந்த 2-ந்தேதி கொடியேற்றத்துடன் தொடங்கியது. தினமும் பல்வேறு சிறப்பு பூஜைகள் நடந்தது. நேற்று மாலை மலைக்கோவிலில் திருமலை குமரன் எழுந்தருளும் நிகழ்ச்சியும், தொடர்ந்து சூரசம்ஹாரமும் நடந்தது. இதில் பக்தர்கள் திரளாக கலந்து கொண்டனர்.