கார்த்திகை தீபத்திருவிழா 10-ந்தேதி கொடியேற்றத்துடன் தொடங்குகிறது
திருவண்ணாமலை அருணாசலேஸ்வரர் கோவிலில் கார்த்திகை தீபத் திருவிழா வருகிற 10-ந் தேதி கொடியேற்றத்துடன் தொடங்குகிறது. விழாவையொட்டி இன்று (ஞாயிற்றுக்கிழமை) துர்க்கையம்மன் உற்சவம் நடக்கிறது.
திருவண்ணாமலை
திருவண்ணாமலை அருணாசலேஸ்வரர் கோவிலில் கார்த்திகை தீபத் திருவிழா வருகிற 10-ந் தேதி கொடியேற்றத்துடன் தொடங்குகிறது. விழாவையொட்டி இன்று (ஞாயிற்றுக்கிழமை) துர்க்கையம்மன் உற்சவம் நடக்கிறது.
கார்த்திகை தீபத் திருவிழா
திருவண்ணாமலை அருணாசலேஸ்வரர் கோவிலில் கார்த்திகை தீபத் திருவிழா வருகிற 10-ந் தேதி (புதன்கிழமை) கொடியேற்றத்துடன் தொடங்குகிறது.
விழாவை முன்னிட்டு கொடியேற்றத்திற்கு முந்தைய 3 நாட்கள் காவல் தெய்வ வழிபாடு நடைபெறும்.
அதன்படி இன்று (ஞாயிற்றுக்கிழமை) திருவண்ணாமலை சின்னக்கடை வீதியில் உள்ள துர்க்கை அம்மன் கோவிலில் துர்க்கையம்மன் உற்சவம் நடக்கிறது.
நாளை (திங்கட்கிழமை) அருணாசலேஸ்வரர் கோவில் 3-ம் பிரகாரத்தில் உள்ள பிடாரி அம்மன் சன்னதியில் உற்சவ நிகழ்ச்சி நடைபெற உள்ளது. நாளை மறுநாள் (செவ்வாய்க்கிழமை) விநாயகர் உற்சவ நிகழ்ச்சி நடைபெற உள்ளது.
தொடர்ந்து கார்த்திகை தீபத் திருவிழா வருகிற 10-ந் தேதி காலை 6 மணியில் இருந்து 7.30 மணிக்குள் சாமி சன்னதியில் உள்ள தங்ககொடி மரத்தில் கொடியேற்றம் நிகழ்ச்சி நடைபெற உள்ளது.
அன்று காலைமற்றும் இரவில் கோவில் 5-ம் பிரகாரத்தில் பஞ்சமூர்த்திகள் உலா நடைபெற உள்ளது. அதிலிருந்து 9-ம் நாள் விழா வரை காலையில் விநாயகர் மற்றும் சந்திரசேகர் உலாவும், இரவில் பஞ்சமூர்த்திகள் விழாவும் நடைபெற உள்ளது.
மகா தீபம்
கொரோனா நோய் தொற்றை கட்டுப்படுத்தும் வகையில் கடந்த ஆண்டை போன்று இந்த ஆண்டும் சாமி உலா கோவிலின் 5-ம் பிரகாரத்தில் நடைபெற உள்ளது. விழா நாட்களில் பல்வேறு கட்டுப்பாடுகளுடன் பக்தர்கள் தரிசனத்திற்கு அனுமதிக்கப்பட உள்ளனர்.
வழக்கமாக 7-ம் நாள் விழாவன்று கோவிலை சுற்றியுள்ள மாட வீதியில் தேரோட்டம் நடைபெறும். இந்த ஆண்டு ஆகம விதிகளின்படி கோவில் வளாகத்திற்குள்ளே உற்சவ உலா நடைபெற உள்ளது.
கார்த்திதை தீபத் திருவிழாவின் சிகர நிகழ்ச்சியாக 19-ந் தேதி (10-ம் நாள் விழா) விடியற்காலை 4 மணிக்கு கோவில் கருவறைக்கு முன்பு பரணி தீபமும், மதியம் சுப்ரமணியர் பிரம்ம தீர்த்தக் குளத்தில் தீர்த்தவாரி நிகழ்ச்சியும் நடக்கிறது.
மாலை 6 மணிக்கு பஞ்ச மூர்த்திகள் தீப தரிசனம் மண்டம் எழுந்தருள அர்த்தநாரீஸ்வரர் காட்சியும், கோவில் பின்புறம் உள்ள அண்ணாமலையார் மலை உச்சியில் மகா தீபம் ஏற்றும் நிகழ்ச்சியும் நடைபெற உள்ளது. பின்னர் இரவு பஞ்ச மூர்த்திகள் உற்சவ உலாவும் நடைபெற உள்ளது.
விழாவிற்கான ஏற்பாடுகள் மற்றும் பாதுகாப்பு பணிகளை மாவட்ட நிர்வாகம், கோவில் நிர்வாகத்தினர் செய்து வருகின்றனர்.