கோபி அருகே சாக்கடைக்குள் தவறி விழுந்த குதிரை- தீயணைப்பு வீரர்கள் உயிருடன் மீட்டனர்

கடத்தூர்

கோபி அருகே சாக்கடைக்குள் தவறி விழுந்த குதிரையை தீயணைப்பு வீரர்கள் உயிருடன் மீட்டனர். 

கோபி அருகே உள்ள மொடச்சூரில் ஏராளமான குதிரைகள் நடு ரோட்டிலேயே சுற்றித்திரிகின்றன. இவைகளால் போக்குவரத்தும் பாதிக்கப்படுகிறது. இதுபற்றி ஏற்கனவே பொதுமக்கள் புகார் கூறி வருகிறார்கள். 

இந்தநிலையில் மொடச்சூர் சுப்பு நகரில் ஒரு குதிரை ரோட்டு ஓரம் முளைத்திருந்த புற்களை மேய்ந்து கொண்டிருந்தது. அப்போது மழையும் பெய்து கொண்டு இருந்தது. 

புற்களை மேய்ந்துகொண்டு இருந்த குதிரை கால் தவறி அருகே இருந்த சாக்கடையில் விழுந்துவிட்டது. சாக்கடைக்குள் இருந்து குதிரையால் எழுந்து நிற்கமுடியவில்லை. இதனால் கத்தியது. 

அந்த வழியாக வாகனங்களில் சென்றவர்கள் இதைப்பார்த்து உடனே கோபி தீயணைப்பு நிலையத்துக்கு தகவல் கொடுத்தார்கள். அதன்பேரில் தீயணைப்பு வீரர்கள் அங்கு விரைந்து வந்து, கயிறு கட்டி சாக்கடையில் இருந்து குதிரையை உயிருடன் மேலே மீட்டார்கள். காயங்கள் ஏதும் இல்லாததால் குதிரை தானாக நடந்து சென்றுவிட்டது. 

குதிரை வளர்ப்பவர்கள் அதை லாயத்தில் கட்டி பராமரிக்கவேண்டும். ரோட்டில் திரியவிடக்கூடாது என்று அப்பகுதி மக்கள் கோரிக்கை வைத்துள்ளார்கள்.