பழனி அருகே லாரி-மோட்டார் சைக்கிள் மோதல்; வாலிபர் பலி

பழனி:

பழனியை அடுத்த பழைய ஆயக்குடியை சேர்ந்தவர் அரவிந்தன் (வயது 25). இவர் நேற்று முன்தினம் தனது நண்பர் பிரகாஷ் என்பவருடன் மோட்டார்சைக்கிளில் பழனி சென்றுவிட்டு மீண்டும் ஊருக்கு திரும்பி வந்துகொண்டிருந்தார். 

மோட்டார் சைக்கிளை அரவிந்தன் ஓட்டினார். வழியில் வீட்டுவசதி வாரிய குடியிருப்பு அருகே வந்தபோது எதிரே வந்த லாரி எதிர்பாராதவிதமாக மோட்டார்சைக்கிள் மீது மோதியது. இதில் அரவிந்தன் படுகாயம் அடைந்தார். பிரகாசுக்கு லேசான காயம் ஏற்பட்டது. 

இதுகுறித்து தகவலறிந்த ஆயக்குடி போலீசார் சம்பவ இடத்துக்கு விரைந்து சென்று இருவரையும் மீட்டு சிகிச்சைக்காக பழனி அரசு மருத்துவமனைக்கு அனுப்பி வைத்தனர். ஆனால் அங்கு சிகிச்சை பலனின்றி அரவிந்தன் பரிதாபமாக இறந்தார். விபத்து தொடர்பாக போலீசார் வழக்குப்பதிவு செய்து விசாரித்து வருகின்றனர்.