பெண் உள்பட 2 பேர் பலி

உப்பிலியபுரம், அக்.27-
வெவ்வேறு விபத்தில் பெண் உள்பட 2 பேர் பலியானார்கள்.
பெண் பலி
உப்பிலியபுரத்தை அடுத்த எரகுடி ரெட்டியார்தெருவை சேர்ந்தவர் மனோகரன். இவரது மனைவி லதா (வயது 45. எல்.ஐ.சி. முகவரான இவர் நேற்று அதிகாலை எரகுடியிலிருந்து வடக்கிப்பட்டி செல்லும் சாலையில், நடைபயிற்சி மேற்கொண்டிருந்தார். அப்போது, பின்னால் வந்த மோட்டார் சைக்கிள் மோதியதில் தூக்கி வீசப்பட்ட அவர் சம்பவ இடத்திலேயே பரிதாபமாக இறந்தார்.
 இது குறித்த புகாரின் பேரில் உப்பிலியபுரம் போலீசார் வழக்குப்பதிவு செய்து விசாரணை நடத்தி வருகின்றனர். மேலும் லதா மீது மோதிவிட்டு நிற்காமல் சென்ற மோட்டார் சைக்கிளை தேடி வருகின்றனர்.
முதியவர் பலி
இதேபோல் காட்டுப்புத்தூர் அருகே உள்ள சேர்வைகாரன்பட்டி கிராமத்தை சேர்ந்தவர் சந்தானம். இவரது மகன் கிருஷ்ணமூர்த்தி (62) இவர் நேற்று முன்தினம் ஏழூர்பட்டியில் நடந்த வார சந்தைக்கு சென்று விட்டு மோட்டார் சைக்கிளில் வீடு திரும்பினார். திருச்சி நாமக்கல் சாலையில் உள்ள ஒரு கடலை அருகே வந்தபோது எதிரே தலைமலைபட்டியை  சேர்ந்த ராமசாமி (28) என்பவர் ஓட்டி வந்த மோட்டார் சைக்கிள் மோதியதில் பலத்த காயம் அடைந்த கிருஷ்ணமூர்த்தி  சேலம் அரசு மருத்துவமனையில் சேர்க்கப்பட்டார். அங்கு அவர் சிகிச்சை பலன் இன்றி இறந்தார். இது குறித்து காட்டுப்புத்தூர் போலீசார் வழக்குப்பதிவு செய்து விசாரணை நடத்தி வருகின்றனர்.