19 பதவிகளுக்கு ஊரக உள்ளாட்சி இடைத்தேர்தல்
திருப்பூர் மாவட்டத்தில் 19 பதவிகளுக்கு ஊரக உள்ளாட்சி இடைத்தேர்தல் இன்று (சனிக்கிழமை) நடக்கிறது. வாக்குச்சாவடிகளில் பலத்த போலீஸ் பாதுகாப்பு போடப்பட்டுள்ளது.
திருப்பூர்
திருப்பூர் மாவட்டத்தில் 19 பதவிகளுக்கு ஊரக உள்ளாட்சி இடைத்தேர்தல் இன்று (சனிக்கிழமை) நடக்கிறது. வாக்குச்சாவடிகளில் பலத்த போலீஸ் பாதுகாப்பு போடப்பட்டுள்ளது.
19 பதவிக்கு இன்று இடைத்தேர்தல்
திருப்பூர் மாவட்டத்தில் காலியாக உள்ள பதவிகளுக்கு ஊரக உள்ளாட்சி இடைத்தேர்தல் இன்று (சனிக்கிழமை) நடக்கிறது. அதன்படி காங்கேயம் ஒன்றியத்தில் உள்ள மாவட்ட ஊராட்சியின் 10-வது வார்டு உறுப்பினர் பதவிக்கும், தாராபுரம் ஒன்றியத்தில் 12-வது வார்டு உறுப்பினர் பதவிக்கும், அவினாசி ஒன்றியத்தில் கருவலூர் ஊராட்சி தலைவர், மூலனூர் ஒன்றியத்தில் எரிசினம்பாளையம் ஊராட்சி தலைவர், உடுமலை ஒன்றியத்தில் எஸ்.வேலூர் ஊராட்சி தலைவர் பதவிக்கு இடைத்தேர்தல் நடக்கிறது.
அவினாசி ஒன்றியம் பழங்கரை ஊராட்சி 9-வது வார்டு, ராமநாதபுரம் ஊராட்சி 2-வது வார்டு, தாராபுரம் ஒன்றியத்தில் பொன்னாபுரம் ஊராட்சியில் 1-வது வார்டு, குடிமங்கலம் ஒன்றியத்தில் ஆமந்தக்கடவு ஊராட்சியில் 5-வது வார்டு, காங்கேயம் ஒன்றியத்தில் கணபதிபாளையம் ஊராட்சியில் 5-வது வார்டு, குண்டடம் ஒன்றியத்தில் எல்லப்பாளையம் புதூர் ஊராட்சியில் 8-வது வார்டு, மூலனூர் ஒன்றியத்தில் கருப்பன்வலசு ஊராட்சியில் 3-வது வார்டு தேர்தல் இன்று நடக்கிறது. அது போல் பல்லடம் ஒன்றியத்தில் மாணிக்காபுரம் ஊராட்சியில் 5-வது வார்டு, பணிக்கம்பட்டி ஊராட்சியில் 8-வது வார்டு, பொங்கலூர் ஒன்றியத்தில் அவினாசிப்பாளையம் ஊராட்சியில் 8-வது வார்டு, உகாயனூர் ஊராட்சியில் 5-வது வார்டு, ஊத்துக்குளி ஒன்றியத்தில் கணபதிபாளையம் ஊராட்சியில் 5-வது வார்டு, வடுகபாளையம் ஊராட்சியில் 4-வது வார்டு, வெள்ளகோவில் ஒன்றியம் மேட்டுப்பாளையம் ஊராட்சியில் 1-வது வார்டு என 1 மாவட்ட ஊராட்சி உறுப்பினர், 1 ஊராட்சி ஒன்றியக்குழு உறுப்பினர், 3 ஊராட்சி தலைவர்கள், 14 வார்டு உறுப்பினர்கள் என 19 பதவிகளுக்கு இடைத்தேர்தல் இன்று நடக்கிறது.
140 வாக்குச்சாவடிகள்
மாவட்டத்தில் 140 வாக்குச்சாவடிகளில் இன்று வாக்குப்பதிவு நடைபெற உள்ளது. இதற்காக அந்தந்த வாக்குச்சாவடிகளுக்கு ஓட்டுப்பெட்டிகள் அனுப்பி வைக்கப்பட்டன. வாக்குச்சீட்டு பயன்படுத்தப்படுகிறது. மாவட்ட ஊராட்சி உறுப்பினர் பதவிக்கு மஞ்சள் நிற சீட்டும், ஒன்றிய வார்டு உறுப்பினர் பதவிக்கு பச்சை நிற சீட்டும், ஊராட்சி தலைவர் பதவிக்கு இளஞ்சிவப்பு நிற சீட்டும், ஊராட்சி வார்டு உறுப்பினர் பதவிக்கு வெள்ளை நிற சீட்டும் பயன்படுத்தப்படுகிறது.
வாக்குச்சீட்டில் முத்திரையை குத்தி வாக்காளர்கள் கவனமுடன் மடித்து ஓட்டுப்பெட்டியில் போடுவதற்கான பயிற்சி அளிக்கப்பட்டுள்ளது. வாக்குப்பதிவு காலை 7 மணிக்கு தொடங்கி மாலை 6 மணி வரை நடைபெற உள்ளது. மாலை 5 மணி முதல் 6 மணி வரை கொரோனாவால் பாதிக்கப்பட்டவர்களுக்கு வாக்களிக்க வசதி செய்யப்பட்டுள்ளது. மாலை 6 மணி வரை வாக்குச்சாவடிக்குள் இருக்கும் வாக்காளர்களுக்கு டோக்கன் வழங்கப்பட்டு அவர்கள் வாக்களிக்க வசதி செய்யப்பட்டுள்ளது.
பலத்த போலீஸ் பாதுகாப்பு
ஒரு வாக்குச்சாவடிக்கு வாக்குச்சாவடி நிலை அலுவலர், 4 வாக்குப்பதிவு அலுவலர்கள் நியமிக்கப்பட்டுள்ளனர். 17 மண்டலங்களாக பிரிக்கப்பட்டு மண்டல அதிகாரிகள் மற்றும் போலீசார் நியமிக்கப்பட்டுள்ளனர். 400-க்கும் மேற்பட்டவர்கள் தேர்தல் பணியில் ஈடுபடுத்தப்பட்டுள்ளனர். வாக்குப்பதிவையொட்டி மாவட்ட காவல்துறை சார்பில் பலத்த போலீஸ் பாதுகாப்புக்கு ஏற்பாடு செய்யப்பட்டுள்ளது. வாக்குச்சாவடிக்கு வாக்களிக்க வரும் வாக்காளர்கள் முக கவசம் அணிந்து சமூக இடைவெளியை கடைபிடிக்க வேண்டும். வாக்குச்சாவடியில் வைக்கப்பட்டுள்ள கிருமி நாசினியை பயன்படுத்திய பின்பு வாக்களிக்க வாக்குச்சாவடிக்குள் செல்ல வேண்டும் என்று அறிவுறுத்தப்பட்டுள்ளது.