பள்ளிபாளையத்தில் பள்ளி மாணவி தூக்குப்போட்டு தற்கொலை

பள்ளிபாளையம்:

பள்ளிபாளையம் காந்திபுரம் ரோடு பகுதியை சேர்ந்த விசைத்தறி தொழிலாளியின் மகள் வைஷ்ணவி. இவர் அங்குள்ள அரசு மகளிர் மேல்நிலைப்பள்ளியில் பிளஸ்-1 படித்து வந்தார். இந்தநிலையில் மாணவிக்கு சமீபகாலமாக தீராத வயிற்று வலி இருந்து வந்ததாக கூறப்படுகிறது. இந்தநிலையில் நேற்றும் மீண்டும் மாணவிக்கு வயிற்று வலி ஏற்பட்டதாக தெரிகிறது. 

அந்த சமயம் பெற்றோர் வேலை சென்று விட்டார்களாம். இதனால் வயிற்று வலி தாங்க முடியாமல் வாழ்க்கையில் விரக்தி அடைந்த மாணவி தூக்குப்போட்டு தற்கொலை செய்து கொண்டார். 

இதை பார்த்து அதிர்ச்சி அடைந்த அக்கம்பக்கத்தினர் உடனடியாக மாணவியின் பெற்றோருக்கு தகவல் தெரிவித்தனர். அதன்பேரில் அவர்கள் வீட்டுக்கு விரைந்து வந்து மகளின் உடலை பார்த்து கதறி அழுதனர். இதுகுறித்து பள்ளிபாளையம் போலீசாருக்கு தகவல் தெரிவிக்கப்பட்டது. 

அதன்பேரில் சம்பவ இடத்துக்கு விரைந்து சென்ற போலீசார் மாணவியின் உடலை கைப்பற்றி பள்ளிபாளையம் அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர்.