நாமக்கல் உழவர் சந்தையில் ரூ.3½ லட்சத்துக்கு காய்கறி, பழங்கள் விற்பனை-விலை உயர்வால் விவசாயிகள் மகிழ்ச்சி

நாமக்கல்:

நாமக்கல்லில் கோட்டை சாலையில் உழவர் சந்தை செயல்பட்டு வருகிறது. இங்கு நாமக்கல் மற்றும் அதன் சுற்று வட்டார பகுதிகளில் விளையும் காய்கறிகள் மற்றும் பழங்களை விவசாயிகள் விற்பனை செய்து வருகின்றனர். இந்த சந்தையில் தற்போது கொரோனா பரவலை தடுக்கும் வகையில் 50 சதவீத விவசாயிகள் மட்டுமே அனுமதிக்கப்படுகிறார்கள். அதாவது ஒருநாள் விட்டு ஒருநாள் விவசாயிகள் தங்கள் விளை நிலங்களில் விளையும் பொருட்களை விற்பனை செய்ய அனுமதி அளிக்கப்படுகிறது.

அந்த வகையில் நேற்று 10¼ டன் காய்கறிகள் மற்றும் ¾ டன் பழங்கள் விற்பனைக்கு கொண்டு வரப்பட்டன. இவை ரூ.3 லட்சத்து 61 ஆயிரத்து 315-க்கு விற்பனை செய்யப்பட்டன. இவற்றை நாமக்கல் மற்றும் சுற்று வட்டார பகுதிகளை சேர்ந்த 970 பேர் வாங்கி சென்றனர்.

நாமக்கல் உழவர் சந்தையில் நேற்று தக்காளி ஒரு கிலோ ரூ.18-க்கும், கத்தரி ஒரு கிலோ ரூ.30-க்கும், வெண்டைக்காய் ஒரு கிலோ ரூ.16-க்கும், புடலங்காய் ஒரு கிலோ ரூ.20-க்கும், பீர்க்கன் ஒரு கிலோ ரூ.30-க்கும், கேரட் ஒரு கிலோ ரூ.50-க்கும், பீட்ரூட் ஒரு கிலோ ரூ.38-க்கும், பீன்ஸ் ஒரு கிலோ ரூ.72-க்கும், உருளை கிழங்கு ஒரு கிலோ ரூ.30-க்கும், இஞ்சி ஒரு கிலோ ரூ.60-க்கும் விற்பனை செய்யப்பட்டன.

சின்ன வெங்காயம் ஒரு கிலோ ரூ.27-க்கும், பெரிய வெங்காயம் ஒரு கிலோ ரூ.30-க்கும் விற்பனை செய்யப்பட்டன. காய்கறிகளின் வரத்து அதிகரித்து உள்ள நிலையில், அவற்றின் விலையும் சற்று உயர்ந்து இருப்பதாக உழவர் சந்தை அதிகாரிகள் தெரிவித்தனர். காய்கறி, பழங்களின் விலை உயர்வால் விவசாயிகள் மகிழ்ச்சி அடைந்தனர்.