ஒடசல்பட்டி கூட்ரோடு அருகே போலீசாருக்கு துப்பாக்கி சுடும் பயிற்சி

கடத்தூர்:

தர்மபுரி மாவட்டத்தில் காவல்துறையில் பணியாற்றும் போலீஸ் துணை சூப்பிரண்டு, இன்ஸ்பெக்டர்கள், சப்-இன்ஸ்பெக்டர்கள், போலீசாருக்கு துப்பாக்கி சுடும் பயிற்சி தொடங்கியது. கடத்தூர் அருகேயுள்ள ஒடசல்பட்டி கூட்ரோடு அருகே உள்ள வனப்பகுதியில்  காவல்துறை சார்பில் துப்பாக்கி சுடும் பயிற்சி 1,400 பேருக்கு அளிக்க நடவடிக்கை எடுக்கப்பட்டுள்ளது. இதில் தினமும் 100 முதல் 150 வரையிலான போலீசாருக்கு ஆயுதப்படை போலீஸ் சப்-இன்ஸ்பெக்டர் சின்னசாமி மற்றும் போலீசார் துப்பாக்கி சுடும் பயிற்சியை அளித்து வருகிறார்கள். இதில் கலந்து கொள்ளும் காவலர்களுக்கு ரத்த அழுத்தம், கண் பார்வை பரிசோதனை உள்ளிட்ட மருத்துவ பரிசோதனைகள் நடத்தப்படுகிறது. இந்த பயிற்சியில் துப்பாக்கியை எவ்வாறு கையாள்வது, சுடுவதற்கு தயாராவது என்பது குறித்த பயிற்சியை வழங்கி வருகின்றனர். ஒவ்வொரு போலீசாருக்கும் 3 சுற்றுகள் என 15 தோட்டாக்கள் வழங்கப்பட்டு வருகிறது. இதில் தர்மபுரி மாவட்டத்தை  சேர்ந்த போலீசார் கலந்து கொண்டு தங்களது திறமைகளை வெளிப்படுத்தி வருகின்றனர். இந்த பயிற்சி வருகிற 21-ந்தேதி வரை அளிக்கப்படுகிறது.