தூத்துக்குடியில் பயங்கரம்: உப்பள தொழிலாளி குத்திக்கொலை; மனைவி படுகாயம் வெறிச்செயலில் ஈடுபட்ட முதல் கணவர் கைது

ஸ்பிக்நகர்:

தூத்துக்குடியில் உப்பள தொழிலாளி கத்தியால் குத்திக்கொலை செய்யப்பட்டார். அவருடைய மனைவியும் கம்பால் தாக்கியதில் படுகாயமடைந்தார். இந்த வெறிச்செயலில் ஈடுபட்ட முதல் கணவரை போலீசார் கைது செய்தனர்.

தூத்துக்குடி முள்ளக்காடு சாமி நகரைச் சேர்ந்தவர் மயில்ராஜ் மகன் இசக்கிமணி (வயது 35). இவர் அங்குள்ள உப்பளத்தில் தொழிலாளியாக வேலை செய்து வந்தார். இவருடைய மனைவி இசக்கியம்மாள் (35).

இவர் ஏற்கனவே தூத்துக்குடி எம்.ஜி.ஆர். நகர் பாலம் பகுதியைச் சேர்ந்த லாரி டிரைவரான ேசசுவை (41) திருமணம் செய்து, 2 குழந்தைகளுடன் வசித்து வந்தார். பின்னர் கணவன்-மனைவி இடையே அடிக்கடி குடும்ப தகராறு ஏற்பட்டதால், இசக்கியம்மாள்,  சேசுவை விட்டு பிரிந்து, 2 குழந்தைகளுடன் தனியாக வசித்து வந்தார்.

பின்னர் அவர் இசக்கிமணியை 2-வதாக திருமணம் செய்தார். இசக்கியம்மாளின் குழந்தைகளும் அவர்களுடன் வசித்தனர்.

எனினும் சேசு அடிக்கடி இசக்கியம்மாளை தன்னுடன் சேர்ந்து வாழ வருமாறு கூறி தகராறு செய்து வந்தார். இதனை தட்டிக் கேட்ட இசக்கியம்மாளின் தம்பி வேல்முருகனை சேசு கத்தியால் குத்தியதாக கூறப்படுகிறது. இந்த வழக்கு முத்தையாபுரம் போலீஸ் நிலையத்தில் நிலுவையில் உள்ளது.

இந்த நிலையில் நேற்று முன்தினம் இரவில் இசக்கிமணி தன்னுைடய குடும்பத்தினருடன் வீட்டின் முற்றத்தில் தூங்கிக் கொண்டு இருந்தார். அப்போது அங்கு வந்த சேசு திடீரென்று இசக்கியம்மாளிடம் தகராறு செய்து, அவரை கம்பால் தாக்கினார். இதனை தடுக்க முயன்ற இசக்கிமணியை கத்தியால் சேசு சரமாரியாக குத்தியதாக கூறப்படுகிறது. அவர்களது அலறல் சத்தம் கேட்டு அக்கம்பக்கத்தினர் ஓடி வந்தனர். உடனே ேசசு தப்பி ஓடி விட்டார்.

படுகாயமடைந்த இசக்கிமணி, இசக்கியம்மாள் ஆகிய 2 பேரையும் மீட்டு சிகிச்சைக்காக தூத்துக்குடி அரசு ஆஸ்பத்திரியில் அனுமதித்தனர். அங்கு அவர்களுக்கு தீவிர சிகிச்சை அளிக்கப்பட்டது. ஆனாலும் சிகிச்சை பலனின்றி இசக்கிமணி நேற்று மதியம் பரிதாபமாக இறந்தார். இசக்கியம்மாளுக்கு தீவிர சிகிச்சை அளிக்கப்படுகிறது.

இந்த கொலை சம்பவம் குறித்த புகாரின்பேரில், முத்தையாபுரம் போலீசார் வழக்குப்பதிவு செய்து, வெறிச்செயலில் ஈடுபட்ட சேசுவை கைது செய்து விசாரணை நடத்தி வருகிறார்கள்.

தூத்துக்குடியில் உப்பள தொழிலாளி கத்தியால் குத்திக்கொலை செய்யப்பட்ட சம்பவம் பரபரப்பை ஏற்படுத்தி உள்ளது.