வெவ்வேறு விபத்துகளில் விவசாயி உள்பட 2 பேர் பலி

பழனி:

பழனி மற்றும் கொடைரோடு பகுதிகளில் நிகழ்ந்த வெவ்வேறு விபத்துகளில் விவசாயி உள்பட 2 பேர் பலியாகினர். 

பழனி அருகே உள்ள காவலப்பட்டியை சேர்ந்தவர் முத்துசாமி (வயது 59). விவசாயி. இவர் நேற்று முன்தினம் தனது நண்பரான அதே பகுதியை சேர்ந்த பழனிசாமியுடன் (50) மொபட்டில் பழனி நோக்கி வந்து கொண்டிருந்தார். மொபட்டை முத்துசாமி ஓட்டினார். பழனியை அடுத்த சண்முகநதி பகுதியில் அவர்கள் வந்தபோது, எதிரே வந்த பஸ் ஒன்று எதிர்பாராதவிதமாக மொபட் மீது மோதியது. இதில், மொபட்டில் இருந்து கீழே விழுந்த முத்துசாமிக்கு தலையில் பலத்த காயம் ஏற்பட்டது. பழனிசாமி லேசான காயம் அடைந்தார். 

இதையடுத்து அவர்கள் 2 பேரையும் அக்கம்பக்கத்தினர் மீட்டு சிகிச்சைக்காக பழனி அரசு மருத்துவமனைக்கு அனுப்பி வைத்தனர். அங்கு 2 பேருக்கும் சிகிச்சை அளிக்கப்பட்டது. இதற்கிடையே அவர்களில் முத்துசாமி மட்டும் மேல் சிகிச்சைக்காக மதுரை அரசு மருத்துவமனைக்கு கொண்டு செல்லப்பட்டார். ஆனால் அங்கு சிகிச்சை பலனின்றி அவர் நேற்று இறந்தார். இதுகுறித்து பழனி டவுன் போலீசார் வழக்குப்பதிவு செய்து விசாரித்து வருகின்றனர்.

இதேபோல் கொடைரோடு அருகே உள்ள ராஜதானிக்கோட்டையை சேர்ந்தவர் மீனாட்சி (70). இவர் நேற்று முன்தினம் கொடைரோட்டை அடுத்த சடையாண்டிபுரம் பிரிவு அருகே திண்டுக்கல்-மதுரை நான்கு வழிச்சாலையை கடக்க முயன்றார். அப்போது உத்தரபிரதேசத்தில் இருந்து மதுரை நோக்கி சென்ற கன்டெய்னர் லாரி ஒன்று, மீனாட்சி மீது மோதியது. இந்த விபத்தில் படுகாயம் அடைந்த மீனாட்சிைய, அக்கம்பக்கத்தினர் மீட்டு சிகிச்சைக்காக திண்டுக்கல் அரசு மருத்துவமனையில் சேர்த்தனர். அங்கு சிகிச்சை பலனின்றி அவர் நேற்று பரிதாபமாக இறந்தார். இதுகுறித்து அம்மையநாயக்கனூர் போலீஸ் இன்ஸ்பெக்டர் சண்முகம், சப்-இன்ஸ்பெக்டர் சூரிய திலகராணி ஆகியோர் வழக்குப்பதிவு செய்து விசாரணை நடத்தி வருகின்றனர்.