புதிய கடைகள் ஏலம்: தஞ்சை மாநகராட்சிக்கு ரூ.11 கோடி வருவாய்

தஞ்சாவூர்,

தஞ்சை பழைய பஸ் நிலையம் மற்றும் எதிரே உள்ள திருவையாறு பஸ் நிலையத்தில் ஸ்மார்ட்சிட்டி திட்டத்தின் கீழ் புதிதாக கடைகள் கட்டப்பட்டுள்ளன. பழைய பஸ் நிலையத்தில் 54 கடைகளும், 2 உணவகங்களும், திருவையாறு பஸ் நிலையத்தில் 31 கடைகளும், 8 உணவகங்களும் கட்டப்பட்டுள்ளன. இந்த கடைகளுக்கான பொது ஏலம் மாநகராட்சி அலுவலகத்தில் கடந்த 11-ந் தேதி தொடங்கியது.

முதல்நாளில் ஒரு கடை மட்டுமே ஏலம் விடப்பட்டது. 2-வது நாளில் 26 கடைகளும், 3-வது நாளில் 57 கடைகளும் ஏலம் விடப்பட்டன. இந்த ஏலத்தின் மூலம் ரூ.9 கோடியே 50 லட்சம் வருவாய் கிடைத்தது. 4-வது நாளாக நேற்று பழைய பஸ் நிலையத்தில் 1 கடை, 2 உணவகங்கள், திருவையாறு பஸ் நிலையத்தில் 8 உணவகங்கள், ஒரு பெரிய கடைக்கான ஏலம் நடந்தது.

பழைய பஸ் நிலையத்தில்1 கடை மாத வாடகையாக ரூ.57 ஆயிரத்திற்கும், 2 உணவகங்கள் ரூ.25 ஆயிரம் முதல் ரூ.27 ஆயிரத்திற்கும், திருவையாறு பஸ் நிலையத்தில் 1 பெரிய கடை ரூ.1 லட்சத்து 7 ஆயிரத்திற்கும், 3 உணவகம் ரூ.25 ஆயிரம் முதல் ரூ.27 ஆயிரத்திற்கும் ஏலம் போனது. இன்னும் 5 உணவகங்கள் மட்டும் ஏலம் விட வேண்டியது உள்ளது. இதுவரை விடப்பட்ட ஏலத்தின் மூலம் தஞ்சை மாநகராட்சிக்கு ரூ.11 கோடி வருவாய் கிடைத்துள்ளது.