கொரோனா பரவலை கட்டுப்படுத்த புதிய கட்டுப்பாடுகள் அமல்- சாலைகள் வெறிச்சோடின

ஈரோடு

ஈரோடு மாவட்டத்தில் கொரோனா பரவுவதை கட்டுப்படுத்த புதிய கட்டுப்பாடுகள் அமல்படுத்தப்பட்டன. இதனால் மாலையில் சாலைகள் வெறிச்சோடின.

ஈரோடு மாவட்டத்தில் கொரோனா தொற்று பரவுவதை கட்டுப்படுத்த அத்தியாவசிய கடைகளான பால், மருந்தகம் தவிர மற்ற அனைத்து கடைகளையும் காலை 6 மணி முதல் மாலை 5 மணி வரை செயல்பட அனுமதிக்கப்படும் என்று மாவட்ட கலெக்டர் கிருஷ்ணனுண்ணி அறிவித்தார். இந்த கட்டுப்பாடுகள் நேற்று முதல் அமலுக்கு வந்தன. இதைத்தொடர்ந்து நேற்று மாலை 5 மணிக்கு கடைகள் அடைக்கப்பட்டன.

கடைகளின் ஊழியர்கள் மாலையிலேயே தங்களது வீடுகளுக்கு திரும்பினார்கள். மேலும் கடைகள் அடைக்கப்பட்டு இருந்ததால் வீதிகளில் மக்கள் நடமாட்டம் குறைந்தது. இதனால் நேற்று மாலையில் இருந்தே முக்கிய சாலைகள் வெறிச்சோடி காணப்பட்டன.

உணவகங்களில் மாலை 5 மணிக்கு வரை வாடிக்கையாளர்கள் அமர்ந்து சாப்பிட அனுமதிக்கப்பட்டனர். அதன்பிறகு இரவு 9 மணி வரை பார்சல் மட்டும் வழங்கப்பட்டன.இதேபோல் டீக்கடைகளில் பார்சல் சேவைக்கு மட்டும் அனுமதி அளிக்கப்பட்டு உள்ளது.

டீக்கடைகளும் மாலை 5 மணிக்கு அடைக்கப்பட்டன. ஆர்.கே.வி.ரோடு, மணிக்கூண்டு, ஈஸ்வரன் கோவில் வீதி, நேதாஜிரோடு உள்ளிட்ட பகுதிகளில் உள்ள ஜவுளிக்கடைகள் அடைக்கப்பட்டதால், அந்த பகுதி வெறிச்சோடி கிடந்தன.

ஈரோடு மாநகராட்சிக்கு உள்பட்ட பகுதிகளில் மாலை 5 மணிக்கு மேல் கடைகள் திறக்கப்பட்டு இருந்தால், சீல் வைத்து நடவடிக்கை எடுக்கப்படும் என்று மாநகராட்சி ஆணையாளர் இளங்கோவன் எச்சரிக்கை விடுத்து உள்ளார்.