நாமக்கல் உழவர் சந்தையில் ரூ.3¾ லட்சத்துக்கு காய்கறி, பழங்கள் விற்பனை

நாமக்கல்:

நாமக்கல்-கோட்டை சாலையில் உழவர் சந்தை செயல்பட்டு வருகிறது. இங்கு நாமக்கல் மற்றும் அதன் சுற்று வட்டார பகுதிகளில் விளையும் காய்கறி, பழங்களை கொண்டு வந்து விவசாயிகள் விற்பனை செய்து வருகின்றனர். இந்த சந்தையில் தற்போது கொரோனா பரவலை தடுக்கும் வகையில் 50 சதவீத விவசாயிகள் மட்டுமே அனுமதிக்கப்படுகிறார்கள். அதாவது ஒருநாள் விட்டு ஒருநாள் விவசாயிகள் தங்கள் விளை நிலங்களில் விளையும் பொருட்களை விற்பனை செய்ய அனுமதி அளிக்கப்படுகிறது.

அந்த வகையில் நேற்று 10 டன் காய்கறிகள் மற்றும் 1 டன் பழங்கள் விற்பனைக்கு வந்து இருந்தன. இவை ரூ.3 லட்சத்து 85 ஆயிரத்து 250-க்கு விற்பனை செய்யப்பட்டன. இவற்றை 990 பேர் வாங்கி சென்றனர்.

நாமக்கல் உழவர்சந்தையில் நேற்று தக்காளி கிலோ ரூ.28-க்கும், கத்தரி கிலோ ரூ.52-க்கும், வெண்டைக்காய் கிலோ ரூ.24-க்கும், புடலங்காய் கிலோ ரூ.40-க்கும், பீர்க்கன் கிலோ ரூ.40-க்கும், கேரட் கிலோ ரூ.68-க்கும், பீட்ரூட் கிலோ ரூ.48-க்கும், பீன்ஸ் கிலோ ரூ.68-க்கும், உருளை கிழங்கு கிலோ ரூ.30-க்கும், இஞ்சி கிலோ ரூ.80-க்கும் விற்பனை செய்யப்பட்டன.

சின்ன வெங்காயம் கிலோ ரூ.45-க்கும், பெரிய வெங்காயம் கிலோ ரூ.32-க்கும் விற்பனை செய்யப்பட்டன. காய்கறிகளின் வரத்து குறைந்து இருப்பதால், அவற்றின் விலை சற்று அதிகரித்து இருப்பதாக உழவர்சந்தை அதிகாரிகள் தெரிவித்தனர்.