எலச்சிபாளையம் அருகே லாரி மீது மோட்டார்சைக்கிள் மோதல்; பெண் உள்பட 2 பேர் சாவு

எலச்சிபாளையம்:

எலச்சிபாளையம் அருகே லாரி மீது மோட்டார்சைக்கிள் மோதிய விபத்தில் பெண் உள்பட 2 பேர் இறந்தனர்.

நாமக்கல் மாவட்டம் எலச்சிபாளையம் அருகே உள்ள மரப்பரை பகுதியை சேர்ந்தவர் செல்வராஜ். இவருடைய மகன் கமல்ஜோதி (வயது 23). இவர் கோழிப்பண்ணையில் கோழிகளுக்கு ஊசி போடும் வேலை செய்து வந்தார். தொட்டியபட்டியை சேர்ந்தவர் ராஜேந்திரன். இவருடைய மனைவி ரேவதி (33). இவரும் கோழிகளுக்கு ஊசி போடும் வேலை செய்து வந்தார். 

இந்தநிலையில் நேற்று முன்தினம் இரவு வேலையை முடித்து விட்டு மோட்டார்சைக்கிளில் கமல்ஜோதியும், ரேவதியும் வீட்டுக்கு சென்று கொண்டிருந்தனர். மோட்டார்சைக்கிளை கமல்ஜோதி ஓட்டினார். ரேவதி பின்னால் அமர்ந்திருந்தார். அப்போது எலச்சிபாளையம் அருகே சென்னம்பாளையம் பஸ் நிறுத்தம் அருகே வந்தபோது கட்டுப்பாட்டை இழந்த மோட்டார்சைக்கிள் எதிரே வந்த லாரி மீது பயங்கரமாக மோதியது. 

இதில் தூக்கி வீசப்பட்டு பலத்த காயம் அடைந்த கமல்ஜோதி மற்றும் ரேவதி ஆகியோர் சம்பவ இடத்திலேயே பரிதாபமாக இறந்தனர். தகவல் அறிந்து சென்ற எலச்சிபாளையம் போலீசார் 2 பேரின் உடல்களை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர். மேலும் இந்த விபத்து குறித்து எலச்சிபாளையம் போலீசார் வழக்குப்பதிவு செய்து விசாரணை நடத்தி வருகின்றனர்.