கணவன் கண்முன்னே கார் மோதி பெண் பலி தலைவாசல் அருகே பரிதாபம்

தலைவாசல்:

சேலம் மாவட்டம் தலைவாசல் அருகே மணிவிழுந்தான் காலனியை சேர்ந்தவர் அருணாசலம். இவருடைய மனைவி செல்லம்மாள் (வயது 71). கணவன்- மனைவி இருவரும் நேற்று காலை 9 மணி அளவில் விவசாய நிலத்துக்கு பூச்சிக்கொல்லி மருந்து வாங்க தலைவாசலில் இருந்து மும்முடிக்கு மோட்டார் சைக்கிளில் வந்தனர்.

சேலம்- சென்னை தேசிய நெடுஞ்சாலையில் சாலையோரம் மோட்டார் சைக்கிளை நிறுத்தினர். பின்னர் கணவன்-மனைவி இருவரும் பூச்சிமருந்து கடைக்கு செல்ல சாலையை கடக்க முயன்றனர்.

அப்போது அந்த வழியாக வந்த கார் செல்லம்மாள் மீது மோதியது. இதில் தூக்கி வீசப்பட்ட செல்லம்மாள் சம்பவ இடத்திலேயே துடிதுடித்து பரிதாபமாக இறந்தார். இதைக்கண்டு அருணாசலம் அதிர்ச்சி அடைந்தார். கண் முன்னே மனைவி விபத்தில் பலியானதை கண்டு கதறி அழுதார். இது அங்கிருந்தவர்களை கண்கலங்க செய்தது.

தகவல் அறிந்த தலைவாசல் போலீசார் சம்பவ இடத்துக்கு விரைந்து வந்தனர். செல்லம்மாள் உடலை மீட்டு ஆத்தூர் அரசு ஆஸ்பத்திரிக்கு அனுப்பி வைத்தனர். விபத்து குறித்து தலைவாசல் போலீசார் வழக்குப்பதிவு செய்து விசாரணை நடத்தினர்.