ஓட்டப்பிடாரம் அருகே கணவரை கொலை செய்த மனைவி கைது

ஓட்டப்பிடாரம் அருகே தலையில் கல்லால் தாக்கி கணவரை கொலை செய்த மனைவியை போலீசார் கைது செய்தனர்.

தூத்துக்குடி மாவட்டம் ஓட்டப்பிடாரம் அருகே உள்ள கீழ பூவாணி தெற்கு தெருவைச் சேர்ந்தவர் மாரியப்பன் (56). இவர் அப்பகுதியில் உள்ள மூலிகை செடிகளை வெட்டி சேகரித்து, வெளியூர்களுக்கு விற்பனைக்காக அனுப்பி வந்தார். இவருடைய மனைவி பேச்சியம்மாள் (47). இவர்களுக்கு சரவணன் (25) என்ற மகனும், அமுதசுரபி (19) என்ற மகளும் உள்ளனர்.

கடந்த சில ஆண்டுகளுக்கு முன்பு கணவன்-மனைவி இடையே குடும்ப தகராறு ஏற்பட்டது. இதனால் பேச்சியம்மாள் கணவரை விட்டு பிரிந்து, தன்னுடைய மகன், மகளுடன் அதே பகுதியில் உள்ள மற்றொரு வீட்டில் வசித்து வருகிறார்.

பின்னர் பேச்சியம்மாளும், மகன் சரவணனும் சேர்ந்து மூலிகை செடிகளை சேகரித்து விற்கும் தொழில் செய்து வந்தனர். அவர்கள் கடந்த சில நாட்களாக காட்டு பகுதியில் வெட்டி சேகரித்து வைத்த மூலிகை செடிகள் அடிக்கடி திருட்டு போனது.

நேற்று முன்தினம் பகலில் வழக்கம்போல் பேச்சியம்மாள், அங்குள்ள காட்டு பகுதியில் மூலிகை செடிகளை வெட்டி சேகரித்து வைத்திருந்தார். பின்னர் அவற்றை இரவில் வாகனத்தில் ஏற்றுவதற்காக பேச்சியம்மாள் எடுக்க சென்றார்.

அப்போது அங்கு பேச்சியம்மாள் சேகரித்து வைத்திருந்த மூலிகை செடிகளை மாரியப்பன் எடுத்து கொண்டிருந்தார். இதனைப் பார்த்த மனைவி பேச்சியம்மாள் கண்டித்தார். இதனால் அவர்களுக்கு இடையே வாக்குவாதம் ஏற்பட்டு கைகலப்பானது.

 ஆத்திரம் அடைந்த பேச்சியம்மாள், அங்கு கிடந்த பெரிய கல்லை எடுத்து மாரியப்பன் மீது வீசி தாக்கியதாக கூறப்படுகிறது. இதில் தலையில் பலத்த காயம் அடைந்த மாரியப்பன் ரத்த வெள்ளத்தில் சரிந்து விழுந்து உயிருக்கு போராடினார்.

இதற்கிடையே, மூலிகை செடிகளை ஏற்றுவதற்காக வாகனத்தில் அங்கு வந்த மகன் சரவணன் இதனைப் பார்த்து அதிர்ச்சி அடைந்தார். உடனே மாரியப்பனை மீட்டு சிகிச்சைக்காக ஒட்டநத்தம் அரசு ஆரம்ப சுகாதார நிலையத்துக்கு கொண்டு சென்றனர். ஆனால் அங்கு சிகிச்சை பலனின்றி அவர் பரிதாபமாக உயிரிழந்தார்.

இதுகுறித்து தகவல் அறிந்ததும், மணியாச்சி போலீஸ் இன்ஸ்பெக்டர் கோவிந்தன் மற்றும் போலீசார் சம்பவ இடத்துக்கு விரைந்து சென்றனர். இறந்த மாரியப்பனின் உடலைக் கைப்பற்றி பிரேத பரிசோதனைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர்.

இதுகுறித்து போலீசார் வழக்குப்பதிவு செய்து பேச்சியம்மாளை கைது செய்தனர். ஓட்டப்பிடாரம் அருகே கணவரை கல்லால் தாக்கி மனைவி கொலை செய்த சம்பவம் பெரும் பரபரப்பை ஏற்படுத்தியது.