நாய் குரைத்ததால் தகராறு 2 பேர் கைது

குளித்தலை நாப்பாளையம் பகுதியை சேர்ந்தவர் மனோஜ்குமார் (வயது 19). இவரது வளர்ப்பு நாய் ஒன்று சம்பவத்தன்று குரைத்துள்ளது. அப்போது அந்த வழியாக சென்ற அதே பகுதியைச் சேர்ந்த சீராளன் (22), சந்தோஷ் (20), சுப்பிரமணி (20), நவநீதகிருஷ்ணன் (19) ஆகிய 4 பேரும் நாய் குரைத்தது தொடர்பாக மனோஜ்குமாரிடம் தகராறில் ஈடுபட்டுள்ளனர். பின்னர் மனோஜ்குமாரை அவர்கள் திட்டி தாக்கியுள்ளனர். மேலும் இதுகுறித்து கேட்க வந்த மனோஜ்குமாரின் உறவினர்களான பாலசுப்பிரமணியன் (48) மற்றும் 17 சிறுவன் ஆகிய 2 பேரையும் அவர்கள் தாக்கி கொலை மிரட்டல் விடுத்துள்ளனர். இந்த தகராறு குறித்து மனோஜ்குமார் அளித்த புகாரின் பேரில் சீராளன், சந்தோஷ், சுப்பிரமணி, நவநீதகிருஷ்ணன் ஆகிய 4 பேர் மீதும் குளித்தலை போலீசார் வழக்குப்பதிவு செய்து சீராளன் மற்றும் நவநீதகிருஷ்ணன் ஆகிய 2 பேரையும் கைது செய்து விசாரணை நடத்தி வருகின்றனர். மேலும் தலைமறைவாக உள்ள மற்ற இருவரை தேடி வருகின்றனர்.