கோழிகளை திருடிய 2 வாலிபர்கள் தப்பியோட்டம் போலீசார் வலைவீச்சு

க.பரமத்தி அருகே பள்ளமருத பட்டியை சேர்ந்தவர் உத்தமன் (வயது 55). இவர் தனது தோட்டத்தில் ஆடு, மாடு, நாட்டுக்கோழிகளை வளர்த்து வருகிறார். இந்தநிலையில் நேற்று இரவு சாப்பிடுவதற்காக தனது தோட்டத்தில் இருந்து வீட்டுக்கு வந்து விட்டார். மீண்டும் இரவு 9 மணிக்கு தோட்டத்திற்கு சென்றபோது கோழிகள் சத்தம் போட்டுக் கொண்டிருந்தன. இதனை பார்த்த உத்தமன் வேகமாக கோழிகள் இருக்கும் இடத்திற்கு சென்றார். அப்போது 2 வாலிபர்கள் கோழிகளை திருடி சாக்கு பையில் போட்டுக்கொண்டிருந்தனர்.  இதனை பார்த்த உத்தமன் கூச்சலிட்டார். இவரது அலறல் சத்தம் கேட்டு அருகில் இருந்தவர்கள் வந்து கோழிகளை  திருடியவர்களை சுற்றிவளைத்து பிடித்து விசாரித்தனர். அப்போது, அவர்கள் கரூர் பஞ்சமாதேவி வடக்கு தெருவை சேர்ந்த கந்தசாமி மகன் தினகரன் (24), அவரது நண்பர் சதாசிவம் மகன் சஞ்சய் (வயது 19) என்று கூறினர். அப்போது கண் இமைக்கும் நேரத்தில் அவர்கள் அங்கிருந்தவர்களை தள்ளி விட்டு தப்பியோடி விட்டனர்.  இதுகுறித்து க.பரமத்தி போலீஸ் சப்-இன்ஸ்பெக்டர் தர்மலிங்கம் வழக்குப்பதிவு செய்து, கோழிகளை திருடிய வாலிபர்களை வலைவீசி தேடி வருகின்றனர்.