கூடுதல் கலெக்டர், நகரசபை ஆணையாளருக்கு கொரோனா

ராமநாதபுரம் மாவட்டத்தில் கடந்த சில மாதங்களாக கட்டுக்குள் இருந்த கொரோனா பரவல் சில நாட்களாக மீண்டும் பரவத்தொடங்கி வருகிறது. ஒற்றை இலக்க எண்ணிக்கையில் இருந்து வந்த நிலையில் கடந்த வாரம் தொடங்கி இரட்டை இலக்க எண்ணிக்கையில் பாதிப்பு உயர்ந்து தற்போது 20 முதல் 30 பேர் வரை நாள்தோறும் பாதிக்கப்பட்டு வருகின்றனர்.
மற்ற மாவட்டங்களோடு ஒப்பிடுகையில் கட்டுக்குள்இருந்து வந்த கொரோனா பாதிப்பு தற்போது வேகமாக உயர்ந்து வருவது மக்களிடையே அச்சத்தை ஏற்படுத்தி உள்ளது. அச்சம் ஏற்பட்டாலும் மக்களிடம் கவனக்குறைவு மற்றும் மாவட்ட நிர்வாகத்தின் நடவடிக்கைக்கு ஒத்துழைப்பு அளிக்காமை போன்றவைதான் முக்கிய காரணமாக கருதப்படுகிறது.
இந்நிலையில் ராமநாதபுரம் கூடுதல் கலெக்டர் மற்றும் நகரசபை ஆணையாளர் ஆகியோருக்கு கொரோனா தொற்று உறுதி செய்யப்பட்டுள்ளது. இவர்கள் அவரவர் வீடுகளில் தங்களை தானே தனிமைப்படுத்திக்கொண்டு டாக்டர்களின் அறிவுரைப்படி சிகிச்சை பெற்று வருகின்றனர். மாவட்டத்தின் முக்கிய அதிகாரிகளுக்கு தொற்று உறுதி செய்யப்பட்டுள்ளதால் ஆய்வு கூட்டங்கள், தேர்தல் பணி, கொரோனா தடுப்பு பணி உள்ளிட்டவைகளில் உடன் பணியாற்றிய உயர் அதிகாரிகள் முதல் ஊழியர்கள் வரை கலக்கம் அடைந்துள்ளனர். இவர்களில் பலர் தாங்களாகவே தனிமைப்படுத்திக்கொண்டு கொரோனா பரிசோதனை மேற்கொண்டுள்ளனர். மாவட்டத்தில் உயர் அதிகாரிகள் 2 பேருக்கு கொரோனா தொற்று ஏற்பட்டுள்ள சம்பவம் மக்களிடையே தற்போது அச்சத்தை ஏற்படுத்தி உள்ளது.