பட்டாசு ஆலைகளில் விழிப்புணர்வு ஸ்டிக்கர் ஒட்ட வேண்டும்

சிவகாசி, 

தொடர் விபத்து நடைபெறுவதால் பட்டாசு ஆலைகளில் விழிப்புணர்வு ஸ்டிக்்கர் ஒட்ட வேண்டும் என அதிகாரி கூறினார். 

சிவகாசி மற்றும் அதன் சுற்றுவட்டார பகுதிகளில் ஆயிரத்திற்கும் மேற்பட்ட பட்டாசு ஆலைகள் இயங்கி வருகின்றன.  

கடந்த மாதம் சாத்தூர், சிவகாசி ஆகிய இடங்களில் நடந்த பட்டாசு ஆலை வெடி விபத்தில் 30 பேர் பரிதாபமாக இறந்தனர். அதிகாரிகளின் முதல்கட்ட விசாரணையில் மனித தவறுகள் தான் விபத்துக்கு காரணம் என தெரியவந்தது. இதை தொடர்ந்து பட்டாசு உற்பத்தியில் ஈடுபட்டு வரும் தொழிலாளர்கள் போதிய விழிப்புணர்வு இல்லாமல் பட்டாசு உற்பத்தியில் ஈடுபடுவதும், போதிய கவனம் செலுத்தாமல் கவனக்குறைவாக வேதிப்பொருட்ளை பயன்படுத்துவது மூலமும் விபத்துக்கள் ஏற்படுகிறது என்று கண்டறியப்பட்டது.

 இதைதொடர்ந்து தொழிலாளர்களுக்கு சிறப்பான பயிற்சி வழங்கவும், அவர்களுக்கு போதிய விழிப்புணர்வு வழங்கவும் மத்தியவெடிப்பொருள் கட்டுப்பாட்டுத்துறை முடிவு செய்தது. 

இதனை தொடர்ந்து மத்திய அரசு அதிகாரி சுந்தரேசன், சிவகாசி பகுதியில் உள்ள பட்டாசு ஆலை அதிபர்களை நேரில் வரவழைத்து அதற்கான ஆலோசனை கூட்டத்தை நடத்தினார். இதில் தொழிற்சாலைகளில் அதிக இடங் களில் விழிப்புணர்வு ஸ்டிக்கர்களை ஒட்ட வலியுறுத்தினார். அந்த ஸ்டிக்கர்களில் தொழிலாளர்களுக்கு ஆலோசனை கூறும் வாக்கியங்கள் இடம் பெற வேண்டும் என குறிப்பிட்டார். 

இதை தொடர்ந்து தற்போது சிவகாசியில் 50 சதவீதத்துக்கு மேற்பட்ட பட்டாசு ஆலைகளில் இந்த விழிப்புணர்வு ஸ்டிக்கர்கள் ஒட்டப்பட்டுள்ளது. 

மேலும் பட்டாசு தொழிலாளர்கள் பயணம் செய்யும் வாகனங்களிலும் இந்த ஸ்டிக்கர்கள் ஒட்டப்பட்டுள்ளது. இந்த முயற்சி நிச்சயம் தொழிலாளர்களுக்கு விழிப்பு ணர்வை ஏற்படுத்தும் என சமூக ஆர்வலர்கள் கருத்து தெரிவித்துள்ளனர்.