வேப்பனப்பள்ளி அருகே இருசக்கர வாகனத்தில் கடத்திய 15 கிலோ கஞ்சா பறிமுதல் தப்பியோடிய 2 பேருக்கு வலைவீச்சு

வேப்பனப்பள்ளி:

வேப்பனப்பள்ளி அருகே இருசக்கர வாகனத்தில் கடத்திய 15 கிலோ கஞ்சாவை போலீசார் பறிமுதல் செய்து தப்பியோடிய 2 பேரை வலைவீசி தேடி வருகின்றனர்.

கிருஷ்ணகிரி மாவட்டம் வேப்பனப்பள்ளி போலீஸ் சப்-இன்ஸ்பெக்டர் சந்துரு மற்றும் போலீசார், குப்பம் சாலையில் சிகரலப்பள்ளி பஸ் நிறுத்தம் அருகே ரோந்து சென்றனர். அப்போது அந்த வழியாக இருசக்கர வாகனத்தில் 2 பேர் வந்தனர். அப்போது வாகனத்தில் வைத்திருந்த பை கீழே தவறி விழுந்தது.   ஆனால் போலீசாரை பார்த்ததும் அந்த பையை அவர்கள் எடுக்காமல் மின்னல் வேகத்தில் சென்றுவிட்டனர். இதனால் சந்தேகம் அடைந்த போலீசார் அந்த பையை எடுத்து சோதனை செய்தனர். அதில் 15 கிலோ கஞ்சா இருந்தது தெரியவந்தது. இதையடுத்து போலீசார் கஞ்சாவை பறிமுதல் செய்தனர். 

தொடர்்ந்து போலீசார் நடத்திய விசாரணையில் அவர்கள் 2 பேரும் வேப்பனப்பள்ளி அருகே உள்ள தீர்த்தம் கிராமத்தை சேர்ந்த தேவராஜ் (வயது  35), வெங்கடேஷ் (36) என்பது தெரியவந்தது. மேலும் இவர்கள் 2 பேரும், கர்நாடக மாநிலம் கே.ஜி.எப்.பில் இருந்து ஆந்திர மாநிலம் சித்தூருக்கு இருசக்கர வாகனத்தில் கஞ்சாவை கடத்தி சென்றதும் தெரியவந்தது. 

இது குறித்து வேப்பனப்பள்ளி போலீசார் வழக்குப்பதிவு செய்து, தப்பி ஓடிய  2 பேரையும் வலைவீசி தேடி வருகின்றனர்.