திருமூர்த்தி மலையில் இன்று தை அமாவாசை விழா
திருமூர்த்தி மலையில் இன்று நடைபெற உள்ள தை அமாவாசை விழாவில் கலந்துகொள்வதற்காக பக்தர்கள் மாட்டு வண்டிகளில் குவிந்தனர்
தளி
திருமூர்த்தி மலையில் இன்று (வியாழக்கிழமை) நடைபெற உள்ள தை அமாவாசை விழாவில் கலந்துகொள்வதற்காக பக்தர்கள் மாட்டு வண்டிகளில் குவிந்தனர்.
திருமூர்த்திமலை
திருப்பூர் மாவட்டம் உடுமலையை அடுத்த மேற்குதொடர்ச்சி மலை அடிவாரப்பகுதியில் திருமூர்த்தி மலை உள்ளது. இங்குள்ள அமணலிங்கேஸ்வரர் கோவி்லில் பிரம்மா, சிவன், விஷ்ணு ஆகிய மும்மூர்த்திகள் குன்றில் ஒன்றாக அமர்ந்து பக்தர்களுக்கு அருள்பாலித்து வருகிறார்கள்.
கோவிலின் அடிவாரத்தில் இருந்து சுமார் 900 மீட்டர் உயரத்தில் அடர்ந்த வனப்பகுதியில் பஞ்சலிங்க அருவி அமைந்துள்ளது. அருவியில் குளித்து மகிழவும், மும்மூர்த்திகளை தரிசனம் செய்யவும் நாள்தோறும் ஏராளமான சுற்றுலா பயணிகள் மற்றும் பக்தர்கள் திருமலைக்கு வருகை தருகின்றனர்.
தை அமாவாசை
அமணலிங்கேஸ்வரர் கோவிலில் அமாவாசை, கிருத்திகை, பிரதோஷம், மகாசிவராத்திரி உள்ளிட்ட விசேஷ நாட்களில் மும்மூர்த்திகளுக்கு சிறப்பு பூஜைகள் நடைபெற்று வருகிறது. ஆனால் தை மற்றும் ஆடி மாதங்களில் வருகின்ற அமாவாசை நாட்கள் மிகவும் விசேஷமானது என்பதால் அன்றைய தினங்களில் பக்தர்கள் அதிகளவில் வருகை தருவார்கள். அத்துடன் அமாவாசை விழாவில் கலந்துகொள்வதற்காக சுற்றுப்புற கிராமங்களை சேர்ந்த மற்றும் வெளிமாவட்ட பக்தர்கள் மாட்டு வண்டிகளில் வருவதை பாரம்பரிய வழக்கமாக கொண்டு உள்ளார்கள்.
அதுமட்டுமின்றி அமாவாசைக்கு முன்தினம் திருமூர்த்தி மலைக்கு மாட்டு வண்டிகளில் வருகின்ற பக்தர்கள் இரவு முழுவதும் கோவில் மற்றும் அணைப்பகுதியில் தங்கிக்கொள்கின்றனர்.
பின்னர் காலையில் எழுந்து அருவிக்கு சென்று குளித்துவிட்டு மும்மூர்த்திகளை தரிசனம் செய்கின்றனர். அதன் பின்னர் மறைந்த தங்களது முன்னோர்களுக்கு பாலாற்றின் கரையில் அமர்ந்து தர்ப்பணம் கொடுத்து விட்டு திரும்பிச்செல்வார்கள்.
மாட்டுவண்டிகளில்...
அந்த வகையில் இன்று (வியாழக்கிழமை) திருமூர்த்தி மலையில் நடைபெற உள்ள தை அமாவாசை விழாவில் கலந்துகொள்வதற்காக நேற்று காலையில் இருந்தே பக்தர்கள் குதிரை வண்டி மற்றும் மாட்டு வண்டிகளில் வந்த வண்ணம் இருந்தனர்.
அதன் பின்னர் களைப்படைந்த மாடுகளுக்கு பெருமாள் கோவில் அருகில் வண்டிகளுடன் ஓய்வு அளிக்கப்பட்டது. இதனால் நேற்று திருமூர்த்தி மலை பகுதியில் மாட்டு வண்டிகள் அதிகளவில் காணப்பட்டது. அதுமட்டுமின்றி மாட்டு வண்டிகளின் வருகையால் உடுமலை திருமூர்த்திமலை சாலையில் போக்குவரத்து நெரிசல் ஏற்பட்டது. இதையடுத்து தளி போலீசார் போக்குவரத்தை சீரமைக்கும் பணியில் ஈடுபட்டனர்.
போலீஸ் பாதுகாப்பு
மேலும் தை அமாவாசையை முன்னிட்டு இன்று பக்தர்கள் அதிக அளவில் திருமூர்த்திமலைக்கு வருகை தருவதற்கான வாய்ப்புகள் உள்ளது.
இதனால் திருமூர்த்திமலை பகுதியில் நேற்று காலை முதல் போலீஸ் பாதுகாப்பு பலப்படுத்தப்பட்டுள்ளது. இதற்கான பணியில் உடுமலை சப்-டிவிஷனுக்கு உட்பட்ட போலீசாரும், ஊர்க்காவல் படையினரும் ஈடுபட்டு வருகின்றனர்.