தாக்குதலில் காயமடைந்த வாலிபர் சாவு கொலை வழக்காக மாற்றி போலீசார் விசாரணை

வில்லியனூர்,

வில்லியனூர் அருகே உள்ள தமிழக பகுதியான அம்மணங்குப்பம் பகுதியை சேர்ந்தவர் எழிலரசன் (வயது 20). இவர், கடந்த 26-ந் தேதி தனது நண்பர் பிரசிதரன் (25) என்பவருடன் சங்கராபரணி ஆற்றின் பாலத்தின் கீழ் அமர்ந்து பேசிக்கொண்டிருந்தார்.

அப்போது அங்கு வந்த 4 பேர் கொண்ட கும்பல் 2 பேரையும் சரமாரியாக தாக்கியது. இதில் பலத்த காயம் அடைந்த பிரசிதரன் ஜிப்மர் மருத்துவமனையில் சிகிச்சை பெற்று வந்தார். எழிலரசன் லேசான காயம் அடைந்தார்.

இதுகுறித்து வில்லியனூர் போலீஸ் நிலையத்தில் எழிலரசன் புகார் செய்தார். அதன்பேரில் போலீஸ் சப்-இன்ஸ்பெக்டர் குமார் வழக்குப்பதிவு செய்து விசாரணை நடத்தினார். அப்போது முன்விரோதம் காரணமாக செல்லிப்பட்டு பகுதியை சேர்ந்த சஞ்சய், மருதுபாண்டி, ராஜேஷ், பிரசாந்த் ஆகிய 4 பேர் கொண்ட கும்பல் தாக்கியது தெரியவந்தது.

இதையடுத்து 4 பேரையும் போலீசார் கைது செய்து சிறையில் அடைத்தனர். இதற்கிடையே ஜிப்மர் மருத்துவமனையில் சிகிச்சை பெற்று வந்த பிரசிதரன் சிகிச்சை பலனின்றி நேற்று இறந்தார். இதையடுத்து இந்த வழக்கை கொலை வழக்காக மாற்றி போலீசார் விசாரணை நடத்தி வருகின்றனர்.