தியேட்டர்களை திறக்க முன்னேற்பாடு பணிகள் தீவிரம்

ஈரோடு,

கொரோனா வைரஸ் பரவல் காரணமாக தமிழகத்தில் உள்ள தியேட்டர்கள் கடந்த மார்ச் மாதம் முதல் மூடப்பட்டு உள்ளது. தற்போது கொரோனா வைரஸ் தாக்கம் சற்று குறைய தொடங்கி உள்ளதால் படிப்படியாக பல்வேறு தளர்வுகள் அறிவிக்கப்பட்டு வருகிறது. அதன்படி இன்று (செவ்வாய்க்கிழமை) முதல் தியேட்டர்களை திறக்கலாம் என அரசு அறிவித்துள்ளது.

இதற்காக அரசு பாதுகாப்பு வழிமுறைகள் வெளியிட்டது. அதன்படி சமூக இடைவெளி விட்டு இருக்கைகள் அமைக்கப்பட வேண்டும். கண்டிப்பாக முக கவசம் அணிந்து வரவேண்டும். உடல் வெப்ப நிலையை கண்டறியும் வகையில் தியேட்டருக்கு வரும் மக்களுக்கு தெர்மல் ஸ்கேன் மூலம் பரிசோதனை செய்ய வேண்டும்.

தியேட்டர் நுழைவாயில் பகுதியில், கைகளை சுத்தப்படுத்தும் வகையில் சனிடைசர் வைக்க வேண்டும் உட்பட பல்வேறு பாதுகாப்பு வழிமுறைகளை வெளியிட்டு உள்ளது. ஈரோடு மாவட்டத்தை பொறுத்தவரை மாநகர் பகுதியில் 11 தியேட்டர்கள் உள்பட மாவட்டம் முழுவதும் மொத்தம் 35 தியேட்டர்கள் உள்ளன.

இன்று (செவ்வாய்க்கிழமை) தியேட்டர்கள் திறக்கப்பட உள்ளதையொட்டி முன்னேற்பாடு பணிகள் நேற்று தீவிரமாக நடந்தது. தியேட்டர்களில் சமூக இடைவெளி கடைபிடிக்கும் வகையில் இருக்கைகள் மாற்றி அமைக்கப்பட்டு உள்ளன. தியேட்டர் முழுவதும் கிருமிநாசினி மூலம் சுத்தப் படுத்தப்பட்டுள்ளன. இன்று புதுப்படங்கள் எதுவும் ரிலீஸ் ஆகாததால் பழைய படங்கள் திரையிடப்பட உள்ளது. பொதுவாக நாள் ஒன்றுக்கு 4 காட்சிகள் திரையிடப்படும். ஆனால் இன்று 3 காட்சிகள் திரையிட ஏற்பாடுகள் நடைபெற்று வருகிறது.