நாகையில் மீனவர் மர்மச்சாவு கொலை செய்யப்பட்டாரா? போலீசார் விசாரணை

நாகப்பட்டினம்,

நாகையில் மீனவர் மர்மமான முறையில் இறந்துகிடந்தார். அவர் கொலை செய்யப் பட்டாரா? என்பது குறித்து போலீசார் விசாரணை நடத்தி வருகின்றனர்.

மர்மச்சாவு

நாகை முதல் கடற்கரை சாலையில் இறால் மீன் லோடு ஏற்றும் இடம் உள்ளது. இந்த பகுதியின் உள்ளே 40 வயது மதிக்கத்தக்க ஒருவர் மர்மமான முறையில் இறந்துகிடந்தார்.

இதனை பார்த்த அப்பகுதி மக்கள் உடனடியாக நாகை டவுன் போலீசாருக்கு தகவல் தெரிவித்தனர். தகவலின் பேரில் போலீசார் சம்பவ இடத்திற்கு விரைந்து வந்து விசாரணை நடத்தினர். விசாரணையில் இறந்து கிடந்தவர் நாகை காடம்பாடி மகாலட்சுமி நகரை சேர்ந்த மீனவர் சாமிநாதன்(வயது40) என்பதும், இறால் கம்பெனியில் கடந்த 29 ஆண்டுகளுக்கு மேலாக வேலைபார்த்து வந்ததும் தெரியவந்தது.

கொலை செய்யப்பட்டாரா?

இதையடுத்து போலீசார் சாமிநாதன் உடலை கைப்பற்றி பிரேத பரிசோதனைக்கு நாகை அரசு மருத்துவமனைக்கு அனுப்பிவைத்தனர். மீனவர் எப்படி இறந்தார்? கொலை செய்யப்பட்டாரா? அல்லது வேறு ஏதேனும் காரணமா? என்பது குறித்து நாகை டவுன் போலீசார் வழக்குப்பதிவு செய்து விசாரணை நடத்தி வருகின்றனர்.