திருவாரூரில், கொரோனாவுக்கு சிகிச்சை பெற்று வந்த 5 பேர் குணமடைந்து வீடு திரும்பினர்

திருவாரூர்,

திருவாரூரில் கொரோனாவுக்கு சிகிச்சை பெற்று வந்த 5 பேர் குணமடைந்து வீடு திரும்பினர்.

கொரோனாவுக்கு சிகிச்சை

திருவாரூர் அரசு மருத்துவக்கல்லூரி மருத்துவமனையில் திருவாரூர் மாவட்டத்தை சேர்ந்த 14 பேர், நாகை மாவட்டத்தை சேர்ந்த 12 பேரும் என மொத்தம் 26 பேர் கொரோனாவால் பாதிக்கப்பட்டு சிகிச்சை பெற்று வந்தனர். இதில் திருவாரூர் மாவட்டத்தை சேர்ந்த ஒருவர், நாகை மாவட்டத்தை சேர்ந்த 4 பேர் என 5 பேர் முழுவதுமாக நோய் தொற்றில் இருந்து குணமடைந்தனர்.

இதனையடுத்து 5 பேரும் மருத்துவக்கல்லூரி மருத்துவமனையில் இருந்து வீட்டுக்கு அனுப்பி வைக்கப்பட்டனர். முன்னதாக 5 பேரும் மருத்துவமனையின் வெளி நோயாளிகள் பிரிவு முன்பாக தனி, தனியாக அமர வைக்கப்பட்டு இருந்தனர். இதையடுத்து மருத்துவக்கல்லூரி முதல்வர் முத்துக்குமரன் தலைமையில் டாக்டர்கள், செவிலியர்கள் உற்சாகமாக கைத்தட்டி அவரவர் வீடுகளுக்கு தனி ஆம்புலன்ஸ் மூலமாக வழியனுப்பி வைத்தனர். குணம் அடைந்து வீட்டிற்கு திரும்புபவர்கள் அடுத்த 14 நாட்களுக்கு தனிமையில் இருக்கும்படி டாக்டர்கள் அறிவுறுத்தி உள்ளனர்.

வீடு திரும்பினர்

கொரோனா நோய் தொற்றினால் பாதிக்கப்பட்டு திருவாரூர் அரசு மருத்துவக்கல்லூரி மருத்துவமனையில் திருவாரூர் மாவட்டத்தை சேர்ந்த 29 பேர், நாகை மாவட்டத்தை சேர்ந்த 42 பேர் என மொத்தம் 71 பேர் சிகிச்சை பெற்று வந்தனர். இதில் இதுவரை திருவாரூர் மாவட்டத்தை சேர்ந்த 16 பேர், நாகை மாவட்டத்தை சேர்ந்த 34 பேர் குணமடைந்து வீடு திரும்பி உள்ளனர்.

இதனால் தற்போது திருவாரூர் மாவட்டத்தை சேர்ந்த 13 பேர், நாகை மாவட்டத்தை சேர்ந்த 8 பேர் என 21 பேர் மருத்துவக்கல்லூரி மருத்துவமனையில் சிகிச்சை பெற்று வருகிறார்கள் என்பது குறிப்பிடத்தக்கது.