ஓசூர் அரசு ஆஸ்பத்திரி: கொரோனா வார்டில் இருந்து தப்பி ஓடிய பெண்

ஓசூர், 

ஓசூர் அரசு ஆஸ்பத்திரி கொரோனா வார்டில் இருந்து தப்பி ஓடிய பெண்ணை போலீசார் மீட்டு ஆஸ்பத்திரியில் சேர்த்தனர்.

இதுபற்றிய விவரம் வருமாறு:-

கிருஷ்ணகிரி மாவட்டம் ஓசூர் காளேகுண்டா பகுதியை சேர்ந்த 40 வயது பெண் நேற்று முன்தினம் ஓசூர் அரசு ஆஸ்பத்திரிக்கு சிகிச்சைக்காக சென்றார்.

அப்போது அவரை பரிசோதித்த டாக்டர்கள் அந்த பெண்ணுக்கு கொரோனா தொற்று அறிகுறி இருப்பதை அறிந்தனர். இதையடுத்து அவர் அங்குள்ள கொரோனா சிறப்பு வார்டில் உள்நோயாளியாக அனுமதிக்கப்பட்டார்.

இந்த நிலையில், அன்று மாலை அந்த பெண் திடீரென கொரோனா வார்டிலிருந்து தப்பி ஓடி விட்டார். இதையடுத்து ஆஸ்பத்திரி நிர்வாகம் ஓசூர் போலீசாரின் உதவியுடன் அவரை தேடும் பணியில் ஈடுபட்டனர். அப்போது, அந்த பெண் ஆஸ்பத்திரியில் இருந்து வெளியேறி வீட்டுக்கு சென்றது தெரியவந்தது. பின்னர், போலீசார் அவரை மீட்டு ஓசூர் அரசு ஆஸ்பத்திரியில் சேர்த்தனர்.

இச்சம்பவம், ஓசூர் பகுதியில் பரபரப்பை ஏற்படுத்தியுள்ளது.