அடையாள அட்டையை ஒரு நாளைக்கு ஒருமுறை மட்டுமே பயன்படுத்த வேண்டும்: அத்தியாவசிய பொருட்கள் வாங்க இனி வாகனங்களில் செல்ல அனுமதி இல்லை

தஞ்சாவூர்,

அத்தியாவசிய பொருட்கள் வாங்க இனி வாகனங்களில் செல்ல அனுமதி இல்லை. அடையாள அட்டையை ஒரு நாளைக்கு ஒருமுறை மட்டுமே பயன்படுத்த வேண்டும் என கலெக்டர் கோவிந்தராவ் அறிவித்துள்ளார்.

அடையாள அட்டை

தஞ்சை மாவட்ட கலெக்டர் கோவிந்தராவ் விடுத்துள்ள செய்திக்குறிப்பில் கூறியிருப்பதாவது:-

கொரோனா நோய்த்தொற்றை கட்டுப்படுத்தும் வகையில், மத்திய, மாநில அரசுகளால் ஊரடங்கு உத்தரவு பிறப்பிக்கப்பட்டு அமலில் உள்ளது. தஞ்சை மாவட்டத்தில் அத்தியாவசிய பொருட்கள் வாங்க வீட்டைவிட்டு வெளியே வருவதற்கு மாவட்ட நிர்வாகத்தின் சார்பில் மூன்று வண்ணங்களில் அடையாள அட்டை வழங்கப்பட்டுள்ளது. அதன்படி இந்த அட்டையை வைத்திருப்பவர்கள் வாரத்தில் இருநாட்கள் மட்டுமே வெளியே வர முடியும்.

வாகனங்களில் செல்ல அனுமதி இல்லை

கொரோனா தடுப்பு நடவடிக்கைகளை தீவிரப்படுத்தும் வகையில், இனி அடையாள அட்டையை, வாரத்தில் 2 நாட்களில் ஒரு நாளுக்கு ஒருமுறை மட்டுமே பயன்படுத்த வேண்டும். இந்த அடையாள அட்டையை குடும்ப உறுப்பினர்களில் ஒருவர் மட்டுமே பயன்படுத்த வேண்டும். பயன்படுத்துபவரின் ஆதார் மற்றும் குடும்ப அட்டையின் எண்களை அடையாள அட்டையில் பதிவிட வேண்டும்.

அத்தியாவசிய பொருட்கள் வாங்குவதற்கு தங்களின் வீடுகளிலிருந்து ஒரு கி.மீ. தூரத்திற்குள் அமைந்துள்ள கடைகளுக்கு மட்டுமே செல்ல வேண்டும். அத்தியாவசிய பொருட்கள் வாங்குவதற்கு இருசக்கர வாகனங்கள் மற்றும் நான்கு சக்கர வாகனங்கள் பயன்படுத்துவதை தவிர்க்க வேண்டும்.

அனுமதி ரத்து

இன்று (செவ்வாய்க்கிழமை) முதல் போலீசார் மற்றும் கண்காணிப்பு அலுவலர்கள் மூலம் அனுமதி அடையாள அட்டையை சோதனை செய்யும் பணி தீவிரமாக நடைபெற உள்ளது. 1 கி.மீ. தூரத்திற்கு அதிகமாக உள்ள கடைகளுக்கு இருசக்கர மற்றும் நான்கு சக்கர வாகனங்களில் சென்றால், அவர்களின் வாகனம் பறிமுதல் செய்யப்படும். அடையாள அட்டையில் ஆதார் எண் பதிவு செய்த நபரை தவிர்த்து, வேறு நபர்கள் பயன்படுத்தினால், அனுமதி அடையாள அட்டை பறிமுதல் செய்யப்பட்டு, அத்தியாவசிய பொருட்கள் வாங்குவதற்கு வெளியே வருவதற்கான அனுமதி ரத்து செய்யப்படும்.

இவ்வாறு அதில் கூறப்பட்டுள்ளது.