காஞ்சீபுரத்தில் மளிகை கடை உரிமையாளர்களுடன் ஆலோசனை கூட்டம் மாவட்ட கலெக்டர் தலைமையில் நடந்தது

காஞ்சீபுரம், 

கொரோனா வைரஸ் பரவாமல் தடுக்க ஊரடங்கு உத் தரவு அமல்படுத்தப்பட்டு உள்ளது. மளிகை, பால் உள்பட அத்தியாவசிய பொருட்களுக்கான கடைகள் மட்டும் குறிப்பிட்ட நேரம் வரை திறந்து இருக்க அனுமதிக்கப்பட்டு உள்ளது.

இந்தநிலையில் பொதுமக்களுக்கு மளிகை பொருட்கள் சீராக கிடைத்திட காஞ்சீபுரம் மாவட்ட கலெக்டர் அலுவலக வளாக கூட்ட அரங்கில் மளிகை கடை உரிமையாளர்களுடன் ஆலோசனை கூட்டம் நடைபெற்றது. கூட்டத்துக்கு மாவட்ட கலெக்டர் பொன்னையா தலைமை தாங்கினார். இதில் மாவட்ட வருவாய்த்துறை அதிகாரி சுந்தரமூர்த்தி, சப்-கலெக்டர் சரவணன், காஞ்சீபுரம் நகராட்சி கமிஷனர் மகேஸ்வரி மற்றும் மொத்த மளிகை வியாபாரிகள், சூப்பர் மார்க்கெட் உரிமையாளர்கள் என 50-க்கும் மேற்பட்டோர் கலந்து கொண்டனர்.

கூட்டத்தில் கொரோனா வைரஸ் முன்னெச்சரிக்கை நடவடிக்கையாக காஞ்சீபுரம் நகரில் பெரும்பாலான பகுதிகளில் பொதுமக்கள் வெளியே வர தடை விதிக்கப்பட்டு உள்ளதால் அந்த பகுதி மக்களுக்கு வீடுகளுக்கே சென்று மளிகை பொருட்களை வழங்குவது, சென்னையில் இருந்து மளிகை பொருட்கள் ஏற்றிவரும் வாகனங்களை காஞ்சீபுரம் நகருக்குள் வர அனுமதி வழங்குவது, நகருக்குள் உள்ள அந்தந்த பகுதிகளுக்கு வரும் வாகனங்களை அனுமதிப்பது மற்றும் விலைவாசி உயர்வு இல்லாமல் தங்குதடையின்றி பொதுமக்களுக்கு மளிகை பொருட்கள் கிடைக்க வழிவகை செய்வது உள்ளிட்டவைகள் குறித்து மளிகை கடை உரிமையாளர்களுடன் மாவட்ட கலெக்டர் ஆலோசனை நடத்தி சில அறிவுரைகளையும் வழங்கினார்.