மாசிமகத்தை முன்னிட்டு மாமல்லபுரம் கடற்கரையில் திரண்ட இருளர் இன மக்கள் குலதெய்வத்தை வணங்கி மகிழ்ந்து கொண்டாட்டம்

மாமல்லபுரம், 

மாசி மாதத்தில் வரும் மாசிமகத்தை முன்னிட்டு ஆயிரக்கணக்கான பழங்குடி இருளர் இன மக்கள் ஆண்டு்தோறும் மாமல்லபுரம் கடற்கரை கோவிலுக்கு வருவது உண்டு. அங்கு தங்கள் குலதெய்வமான கன்னியம்மன் மாசிமக பவுர்ணமி அன்று கடற்கரையில் அருள்பாலிப்பதாக நம்புகின்றனர். அப்போது, அவர்கள் அங்கு அமைந்துள்ள தங்கள் குல தெய்வமான கன்னியம்மனை வணங்கி தங்கள் உறவு முறைக்குள் திருமணம் மற்றும் நிச்சயத்தார்த்தம் போன்ற சடங்குகளை செய்வது வழக்கம்.

இதற்காக பல்வேறு மாவட்டங்களை சேர்ந்த இருளர் இன மக்கள் மாசிமகத்துக்கு ஒரு நாள் முன்னதாகவே மாமல்லபுரம் கடற்கரையில் ஒன்று கூடுகின்றனர்.

ஜோடிகளுக்கு திருமணம்

அப்போது, தாங்கள் கொண்டு வந்த தென்னங்கீற்று மற்றும் துணிகளால் ஆன குடில்கள் அமைத்து அங்கு தங்கி சமைத்தும் சாப்பிடுகின்றனர். இரவு முழுவதும் கலைநிகழ்ச்சிகள் நடத்தி கொண்டாடி மகிழ்கின்றனர்.

மறுநாள் காலையில் கடற்கரையில் தங்கள் குலதெய்வமான கன்னியம்மனுக்கு மணலில் 7 படி அமைத்து தேங்காய், பூ, பழம் வைத்து வழிபாடு செய்து, காது குத்தல், மொட்டை அடித்தல் உள்ளிட்ட சுபநிகழ்ச்சிகளை நடத்துகின்றனர்.

மேலும், மாசிமக தினத்தன்று நிச்சயம் செய்த ஜோடிகளுக்கு எளிமையாக திருமணம் செய்கின்றனர். அப்போது மணமகன் வேட்டி-சட்டை அணிந்தும், மணமகள் கூரைப்புடவை அணிந்தும் காணப்படுகின்றனர்.

50 ஆயிரத்துக்கும்....

இதையடுத்து, நிகழ்ச்சியின் போது, தங்கள் பாரம்பரிய பாடல்களை பாடியும் மணமக்களை மகிழ்விக்கின்றனர். இந்த ஆண்டு நடைபெற்ற விழாவில், மொத்தம் 10-க்கும் மேற்பட்ட இருளர் இன ஜோடிகளுக்கு திருமணம் நடைபெற்றது. தங்கள் பாரம்பரியங்களை விட்டுக்கொடுக்காமல் ஆண்டுதோறும் மாமல்லபுரம் கடற்கரையில் ஒன்று திரண்டு எளிமையாக வழிபாடு நடத்தியும், திருமணம் செய்தும் தங்கள் பாரம்பரிய கலாசாரத்தை நிலை நிறுத்துகின்றனர்.

இதற்காக மாமல்லபுரம் தெற்கு பக்க கடற்கரையில் பழங்குடி இருளர்கள் சுமார் 50 ஆயிரத்திற்கும் மேற்பட்டோர் நேற்று திரண்டிருந்தனர்.