பள்ளி மாணவர்களுக்கான தடகள போட்டிகள்

பெரம்பலூர், 

தமிழ்நாடு பள்ளி கல்வித்துறை சார்பாக, பெரம்பலூர் மாவட்ட அளவில் 14, 17, 19 வயதிற்கு உட்பட்ட மாணவர்களுக்கான விளையாட்டு போட்டிகள், பெரம்பலூரில் உள்ள எம்.ஜி.ஆர். விளையாட்டு மைதானத்தில் நேற்று நடந்தது. போட்டியினை பெரம்பலூர் கல்வி மாவட்ட அலுவலர் மாரிமீனாள் கொடியசைத்து தொடங்கி வைத்தார். வேப்பூர் கல்வி மாவட்ட அலுவலர் குழந்தைராஜன், மாவட்ட உடற்கல்வி ஆய்வாளர் ராஜேந்திரன் ஆகியோர் முன்னிலை வகித்தனர். தடகள போட்டிகளில் ஓட்டப்பந்தயங்கள், தொடர் ஓட்டம், நீளம் தாண்டுதல், உயரம் தாண்டுதல், குண்டு எறிதல், வட்டு எறிதல், ஈட்டி எறிதல், கோலூன்றி தாண்டுதல், தடை தாண்டும் ஓட்டம், மும்முறை தாண்டுதல் உள்ளிட்டவை நடந்தது.

இதில் ஏற்கனவே பெரம்பலூர், குன்னம் ஆகிய குறு வட்டங்கள் அளவில் நடைபெற்ற தடகள போட்டிகளில் வெற்றி பெற்று முதல், 2 இடத்தை பிடித்த மாணவர்கள் இந்த போட்டிகளில் ஆர்வத்துடன் பங்கேற்று தங்களது திறமைகளை வெளிப்படுத்தினர்.

பின்னர் நடந்த பரிசளிப்பு விழாவில் போட்டிகளில் வெற்றி பெற்று முதல் 3 இடத்தை பிடித்தவர்களுக்கு பெரம்பலூர் மாவட்ட போலீஸ் சூப்பிரண்டு நி‌ஷாபார்த்திபன் பதக்கங்கள், சான்றிதழ்களை வழங்கி பாராட்டினார்.

இதற்கான ஏற்பாடுகளை கொளக்காநத்தம் அரசு மேல்நிலைப்பள்ளியின் தலைமை ஆசிரியர் காமராஜ், உடற்கல்வி ஆசிரியர்கள் பிரபாகரன், கார்த்திக்கேயன் மற்றும் உடற்கல்வி இயக்குனர்கள் செய்திருந்தனர். தடகள போட்டிகளில் முதல் 2 இடங்களை பிடித்தவர்கள் மாநில அளவிலான போட்டிகளில் விளையாடவுள்ளனர் என்பது குறிப்பிடத்தக்கது.