கேரளாவுக்கு கடத்த முயன்ற 650 கிலோ ரேஷன் அரிசி பறிமுதல்; டிரைவர் கைது

செங்கோட்டை, 

கேரளாவுக்கு கடத்த முயன்ற 650 கிலோ ரேஷன் அரிசி பறிமுதல் செய்யப்பட்டது. இதுதொடர்பாக டிரைவர் கைது செய்யப்பட்டார்.

போலீசார் சோதனை

தமிழக-கேரள எல்லையான புளியரை வழியாக தமிழகத்தின் பல்வேறு பகுதிகளில் இருந்து தினமும் ஆயிரக்கணக்கான வாகனங்களில் சரக்குகள் ஏற்றிச் செல்லப்படுகின்றன. அவ்வாறு சரக்குகளை ஏற்றிச் செல்லும் போது தடை செய்யப்பட்ட பொருட்கள் கொண்டு செல்லப்படுகிறதா? என்பதை தடுக்கும் பொருட்டு புளியரை போலீசார் தீவிர வாகன சோதனை நடத்தி வருகிறார்கள்.

இந்த நிலையில் செங்கோட்டை பகுதியில் இருந்து ஆட்டோவில் ரேஷன் அரிசி கேரளாவுக்கு கடத்தப்படுவதாக புளியரை போலீசாருக்கு ரகசிய தகவல் கிடைத்தது. இதையடுத்து போலீசார் புளியரை பகுதியில் வாகன சோதனையில் ஈடுபட்டனர்.

650 கிலோ

அப்போது, அந்த வழியாக வந்த ஆட்டோவை சந்தேகத்தின் பேரில் போலீசார் தடுத்து நிறுத்தினார்கள். அப்போது, அந்த ஆட்டோவில் மூட்டை மூட்டையாக 650 கிலோ ரேஷன் அரிசி இருந்தது கண்டுபிடிக்கப்பட்டது. இதுதொடர்பாக ஆட்டோ டிரைவரான கேரள மாநிலம் தென்மலை பகுதியைச் சேர்ந்த சந்திரன் மகன் அச்சுமோன் (வயது 25) என்பவரை போலீசார் கைது செய்து, அரிசியை பறிமுதல் செய்தனர். மேலும் அவரிடம் இருந்து ரூ.20 ஆயிரமும் பறிமுதல் செய்யப்பட்டது.

இதுகுறித்து புளியரை போலீசார் வழக்குப்பதிவு செய்து மேல் விசாரணை நடத்தி வருகிறார்கள்.