சமூக நீதிக்கான பெரியார் விருது பெற விண்ணப்பிக்கலாம் கலெக்டர் சந்தீப்நந்தூரி தகவல்

தூத்துக்குடி, 

தூத்துக்குடி மாவட்டத்தில் சமூக நீதிக்கான பெரியார் விருது பெற தகுதியானவர்கள் விண்ணப்பிக்கலாம் என்று மாவட்ட கலெக்டர் சந்தீப்நந்தூரி தெரிவித்து உள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறிஇருப்பதாவது:-

பெரியார் விருது

தூத்துக்குடி மாவட்டத்தில் பிற்படுத்தப்பட்டோர் நலம், சமூக நீதிக்காக பாடுபடுபவர்களை சிறப்பு செய்வதற்காக ஒவ்வொரு ஆண்டும் சமூக நீதிக்கான தந்தை பெரியார் விருது தமிழக அரசால் வழங்கப்பட்டு வருகிறது. இந்த விருதை பெறுவோருக்கு தமிழக அரசு சார்பில் ரூ.1 லட்சம் விருது தொகையும், ஒரு பவுன் தங்கப்பதக்கமும், தகுதியுரையும் வழங்கப்பட்டு வருகிறது.

தூத்துக்குடி மாவட்டத்தில் இந்த ஆண்டுக்கான (2019) சமூக நீதிக்கான தந்தை பெரியார் விருது வழங்குவதற்கு உரிய விருதாளரை தேர்ந்தெடுக்கப்பட உள்ளது.

விண்ணப்பம்

எனவே சமூக நீதிக்காக பாடுபட்டு மக்களின் வாழ்க்கைத்தரம் உயர மேற்கொண்ட பணிகள் மற்றும் சாதனைகள் ஆகியவற்றை கொண்டு தகுதியானவர்கள் விண்ணப்பிக்கலாம். விண்ணப்பிக்கும்போது விண்ணப்பதாரரின் பெயர், சுய விவரம், முழுமுகவரியுடன் 10.10.2019 அன்றுக்குள் தூத்துக்குடி மாவட்ட கலெக்டர் என்ற முகவரியில் விண்ணப்பிக்க வேண்டும்.

இவ்வாறு அவர் தெரிவித்து உள்ளார்.