சிதம்பரத்தில் பிளஸ்-2 மாணவி கடத்தல் வாலிபருக்கு வலைவீச்சு

சிதம்பரம், 

சிதம்பரம் பாலமான்கரை அம்பேத்கர் நகரை சேர்ந்தவர் சுந்தரேசன். இவருடைய மகன் முத்துக்குமரன்(வயது 24). இவர், அதே பகுதியை சேர்ந்த 17 வயதுடைய பிளஸ்-2 மாணவி ஒருவரை காதலித்து வந்ததாக கூறப்படுகிறது. இந்த நிலையில் சம்பவத்தன்று அந்த மாணவி, தனது பெற்றோரிடம் கடைக்கு செல்வதாக கூறிவிட்டு சென்றார். அப்போது அங்கு மோட்டார் சைக்கிளில் வந்த முத்துக்குமரன், அந்த மாணவியை கடத்திச்சென்றார்.

இதனிடையே கடைக்கு சென்ற மகள், வீட்டிற்கு வராததால் பெற்றோர் அதிர்ச்சி அடைந்தனர். பின்னர் அவர்கள், கடைக்கு வந்து விசாரித்தனர். அப்போதுதான், தனது மகள் கடத்தப்பட்டது அவர்களுக்கு தெரிந்தது.

இது குறித்து மாணவியின் பெற்றோர், சிதம்பரம் நகர போலீஸ் நிலையத்தில் புகார் கொடுத்தனர். அதன்பேரில் போலீசார் வழக்குப்பதிவு செய்து கடத்தப்பட்ட மாணவியையும், அவரை கடத்திய முத்துக்குமரனையும் வலைவீசி தேடி வருகின்றனர். கடைக்கு சென்ற மாணவி கடத்தப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.