கிருஷ்ணகிரியில் நடமாடும் அருங்காட்சியக ரதம் பள்ளி மாணவ, மாணவிகள் பார்வையிட்டனர்
கிருஷ்ணகிரியில் பழங்கால வரலாற்றை அறிந்துக் கொள்ளும், நடமாடும் அரசு அருங்காட்சியக கண்காட்சி ரதத்தை மாணவ-மாணவிகள் பார்வையிட்டனர்.
கிருஷ்ணகிரி,
சென்னையில் உள்ள அரசு அருங்காட்சியக துறையின் மூலம் ஒவ்வொரு மாவட்டத்திலும் அருங்காட்சியக ரதம் சுற்றுப்பயணம் செய்து வருகிறது. இந்த ரதம் தற்போது, கிருஷ்ணகிரி மாவட்டத்தில் சுற்றுப்பயணம் செய்ய வருகை தந்துள்ளது. கிருஷ்ணகிரி அரசு ஆண்கள் மேல்நிலைப்பள்ளிக்கு வருகை தந்த ரதத்தை, மாவட்ட முதன்மை கல்வி அலுவலர் கே.பி.மகேஸ்வரி வரவேற்று பார்வையிட்டார். தொடர்ந்து ரதத்தை தொடங்கி வைத்தார். நிகழ்ச்சிக்கு அருங்காட்சியக காப்பாட்சியர் கோவிந்தராஜ் தலைமை தாங்கினார்.
இது குறித்து அவர் கூறியதாவது:- சென்னை அரசு அருங்காட்சியகத்தில் இருந்து ஒவ்வொரு மாவட்டத்திலும் மாணவ, மாணவிகள் மற்றும் பொதுமக்கள் பார்வையிட்டு பயன்பெறும் வகையில் அருங்காட்சியக ரதத்தின் மூலம் கண்காட்சி நடத்த திட்டமிட்டு செயல்பட்டு வருகிறது. அதன் அடிப்படையில் கிருஷ்ணகிரி மாவட்டத்திற்கு இந்த ரதம் வருகை தந்துள்ளது.
இந்த ரதம் மாவட்டத்தில் உள்ள 100-க்கும் மேற்பட்ட பள்ளிக்கு செல்லும். குறைந்தபட்சம் 15 ஆயிரம் மாணவ, மாணவிகளுக்கு மேல் பார்வையிடும் வகையில் 15 நாட்கள் பயணம் திட்டம் வகுக்கப்பட்டுள்ளது. அருங்காட்சியகங்கள் மீதும் பழங்கால வரலாற்றை அறிந்து கொள்ள மாணவர்களிடையே ஆர்வத்தை தூண்டும் வகையில், ரதத்தில் தென்னிந்திய நாணயம், சோழர் கால நாணயம், பாரம்பரிய இசைக்கருவிகள், போர் கருவிகள், அரியவகை அஞ்சல் வில்லைகள், சிற்பங்கள், கடல்வாழ் உயிரினங்கள் ஆகியன மெழுகில் தத்ரூபமாக வடிவமைக்கப்பட்டு காட்சிக்கு வைக்கப் பட்டுள்ளன. மண்பாண்டங்கள், கனிமங்கள், தாவரவியல், அரியவகை ஓவியங்கள் உள்ளிட்டவை வைக்கப்பட்டுள்ளன. பண்டைய கால மனிதனின் வரலாறு, வன விலங்குகளின் வாழ்க்கை அமைப்பு உள்ளிட்ட பல்வேறு அம்சங்கள் இடம் பெற்றுள்ளன. மேலும் வாகனத்தின் உள்பகுதியில் மின்னணு திரையில் பாரம்பரிய வரலாற்று சிறப்பு குறித்த குறும்படங்களும் ஒளிபரப்பப்பட்டு வருகின்றன. இந்த ரதம் செல்லும் ஒவ்வொரு பள்ளிக்கு கிருஷ்ணகிரி வரலாற்று ஆய்வு மையம் குழுவினரும், அருங் காட்சியக பணியாளர்கள் உடன் சென்று மாணவ, மாணவிகளுக்கு விளக்கம் அளிப்பார்கள். இவ்வாறு அவர் கூறினார்.
முன்னதாக கிருஷ்ணகிரி அரசு ஆண்கள் மற்றும் பெண்கள் மேல்நிலைப்பள்ளி மாணவ, மாணவிகள் அருங் காட்சியக ரதத்தை பார்வையிட்டனர். இந்த நிகழ்ச்சியின் போது வரலாற்று ஆய்வு மற்றும் ஆவணப்படுத்தும் குழுவின் தலைவர் நாராயணமூர்த்தி, தமிழ்செல்வன், கணேசன், ரவி உள்பட பலர் உடன் இருந்தனர்.