காட்பாடி அருகே தொழிலதிபரை மிரட்டி கார், நகை பறித்த 3 பேர் கைது

காட்பாடி, 

காட்பாடி எம்.ஜி.ஆர். நகரை சேர்ந்தவர் நரேஷ் (வயது 38), தொழிலதிபர். இவர் சம்பவத்தன்று இரவு 8 மணியளவில் பிரம்மபுரம் அருகே தனது நண்பர்களுக்காக காரில் காத்திருந்தார். அப்போது 3 பேர் மோட்டார்சைக்கிளில் வந்தனர். அவர்கள் பீர்பாட்டிலை காட்டி நரேசை மிரட்டினர்.

பின்னர் அவரிடம் இருந்து கார், நகை, செல்போன் மற்றும் ஏ.டி.எம்.கார்டு ஆகியவற்றை பறித்துக் கொண்டு அங்கிருந்து தப்பிச் சென்றுவிட்டனர். இதனால் அதிர்ச்சியடைந்த நரேஷ் கூச்சலிட்டார். ஆனால் இரவு நேரம் என்பதால் 3 பேரும் தப்பிவிட்டனர்.

இதுகுறித்து நரேஷ் காட்பாடி போலீஸ் நிலையத்தில் புகார் செய்தார். அதன்பேரில் இன்ஸ்பெக்டர் புகழ் வழக்குப்பதிவு செய்து விசாரணை நடத்தி வந்தார்.

விசாரணையில் நரேசை மிரட்டி கார், நகையை பறித்துச்சென்றது காட்பாடி காந்திநகர், விருதம்பட்டு, சங்கரன்பாளையம் ஆகிய பகுதிகளை சேர்ந்த 18 வயது வாலிபர்கள் என்பது தெரியவந்தது. அவர்கள் 3 பேரையும் போலீசார் கைது செய்தனர். அவர்களிடம் இருந்து கார், 6 பவுன் நகை, ஏ.டி.எம். கார்டு ஆகியவற்றை போலீசார் கைப்பற்றினர். மேலும் அவர்களிடம் விசாரணை நடத்தி வருகின்றனர்.