பனவடலிசத்திரம் அருகே மொபட் மீது மோட்டார் சைக்கிள் மோதல்; விவசாயி பலி வாலிபர் படுகாயம்

பனவடலிசத்திரம், 

நெல்லை மாவட்டம் பனவடலிசத்திரம் அருகே உள்ள தேவர்குளம் வடகடைசி தெருவை சேர்ந்தவர் முருகராஜ் (வயது 65) விவசாயி. இவர் நேற்று முன்தினம் இரவு பொருட்கள் வாங்குவதற்காக தேவர்குளம் பஜார் பகுதிக்கு மொபட்டில் சென்றார். அப்போது அவர் மொபட்டில் இருந்தபடி சாலையை கடக்க முயன்றார். அந்த சமயத்தில் சங்கரன்கோவில் திரு.வி.க.நகரை சேர்ந்த வேலுச்சாமி மகன் தங்கத்துரை (23) என்பவர் ஓட்டி வந்த மோட்டார் சைக்கிள் எதிர்பாராவிதமாக மொபட் மீது மோதியது. இதில் தூக்கி வீசப்பட்டு 2 பேரும் பலத்த காயம் அடைந்தனர்.

இதை பார்த்த அக்கம்பக்கத்தினர் ஓடி வந்தனர். அவர்கள் தங்கத்துரையை மீட்டு சிகிச்சைக்காக சங்கரன்கோவில் அரசு ஆஸ்பத்திரிக்கும், முருகராஜை பாளையங்கோட்டை ஐகிரவுண்டு அரசு ஆஸ்பத்திரிக்கும் அனுப்பி வைத்தனர். அங்கு சிகிச்சை பலனின்றி நேற்று காலை முருகராஜ் பரிதாபமாக உயிரிழந்தார்.

இதுகுறித்து தேவர்குளம் போலீசார் வழக்குப்பதிவு செய்து விசாரணை நடத்தி வருகின்றனர். விபத்தில் இறந்த முருகராஜிக்கு முத்தம்மாள் (63) என்ற மனைவியும், சரவணன் என்ற மகனும், சவுந்தரியா, மீனா, மாலதி என்ற மகள்களும் உள்ளனர்.