விக்கிரவாண்டி அருகே, கார் மோதி விவசாயி சாவு

விக்கிரவாண்டி,

விக்கிரவாண்டியை அடுத்த ஒரத்தூர் கிராமத்தை சேர்ந்தவர் அழகியநாதமூர்த்தி (வயது 55), விவசாயி. இவர் நேற்று முன்தினம் மாலை தனது மோட்டார் சைக்கிளில் முண்டியம்பாக்கம் சர்க்கரை ஆலை சந்திப்பில் சாலையை கடக்க முயன்றார்.

அப்போது சென்னையில் இருந்து திருச்சி நோக்கி வேகமாக சென்ற கார் ஒன்று, திடீரென கண் இமைக்கும் நேரத்தில் அழகியநாதமூர்த்தியின் மோட்டார் சைக்கிள் மீது மோதியது.

இந்த விபத்தில் தூக்கி வீசப்பட்ட அழகியநாதமூர்த்தி பலத்த காயமடைந்தார். உடனே அக்கம், பக்கத்தில் இருந்தவர்கள் அவரை மீட்டு சிகிச்சைக்காக முண்டியம்பாக்கம் அரசு மருத்துவமனையில் சேர்த்தனர். பின்னர் அங்கிருந்து மேல்சிகிச்சைக்காக சென்னை அரசு மருத்துவமனையில் அனுமதிக்கப்பட்டார். அங்கு அவருக்கு டாக்டர்கள் தீவிர சிகிச்சை அளித்தும் பலனின்றி இறந்தார்.

இந்த விபத்து குறித்து விக்கிரவாண்டி போலீசார் வழக்குப்பதிவு செய்து கார் டிரைவரான தஞ்சாவூரை சேர்ந்த விக்னேஷ் (26) என்பவரை கைது செய்தனர்.