பழையகோட்டை மாட்டுத்தாவணியில் காங்கேயம் இனமாடுகள் ரூ.25 லட்சத்துக்கு விற்பனை

முத்தூர், 

நத்தக்காடையூர் அருகே உள்ள பழையகோட்டை மாட்டுத்தாவணியில் உலகிலேயே வீரத்திற்கும், கம்பீரத்திற்கும் புகழ் பெற்ற காங்கேயம் இன காளைகள், கன்றுகள், மாடுகள் விற்பனை சந்தை வாரந்தோறும் ஞாயிற்றுக்கிழமை நடைபெற்று வருகிறது.

இதன்படி நேற்று நடைபெற்ற சந்தையில் திருப்பூர், ஈரோடு, கரூர், நாமக்கல், திருச்சி, சேலம், கோவை, மதுரை, திண்டுக்கல், தேனி மாவட்டங்களை சேர்ந்த காங்கேயம் இன காளைகள் வளர்ப்போர், நாட்டு மாடுகளை வளர்க்கும் விவசாயிகள், காங்கேயம் இன காளை பராமரிப்பு விருத்தியாளர் ஆகியோர் காங்கேயம் இன பெரிய பூச்சி காளைகள், இளம் பூச்சி காளைகள், செவலை பசுமாடுகள் மயிலை பூச்சிகாளைகள், மயிலை மாடுகள், மயிலை கிடாரிகள், காராம்பசு கிடாரி கன்றுகள் ஆகிய காங்கேயம் இனங்களை மட்டும் விற்பனைக்காக கொண்டு வந்திருந்தனர்.

இதில் காங்கேயம் இன நாட்டு பசுமாடுகள், கன்றுகள், காளைகள் என ரகம் வாரியாக தரம் பிரிக்கப்பட்டு விற்பனை செய்யப்பட்டது. இந்த சந்தையில் காங்கேயம் இன பசுமாடுகளை வாங்குவதற்கு சுமார் ஆயிரத்துக்கும் மேற்பட்ட விவசாயிகள், வியாபாரிகள் அதிக ஆர்வத்துடன் கலந்து கொண்டனர். இதன்படி இந்த சந்தையில் விற்பனைக்காக கொண்டு வரப்பட்ட மொத்தம் 145 காங்கேயம் இன காளைகள், மாடுகளில் மொத்தம் 68 நாட்டு மாடுகள் விற்பனை செய்யப்பட்டது. சந்தையில் அதிகபட்சமாக பிறந்து 15 நாளான கிடாரி கன்றுடன் காங்கேயம் இன மயிலை பசுமாடு ரூ.95 ஆயிரத்துக்கு விற்பனை செய்யப்பட்டது. மேலும் சந்தையில் காங்கேயம் இன இளங்கன்றுகள் ஆரம்ப விலையாக ரூ.21 ஆயிரம் முதல் விற்பனை செய்யப்பட்டது.

இந்த சந்தையில் மொத்தம் ரூ.25 லட்சத்துக்கு காங்கேயம் இன காளைகள், கன்றுகள், மாடுகள் விற்பனை நடைபெற்றது.

இந்த சந்தையில் திருப்பூர், ஈரோடு, கரூர், நாமக்கல்,திருச்சி, கோவை, திண்டுக்கல் மாவட்டங்களை சேர்ந்த காங்கேயம் இன காளைகள், மாடுகள் வளர்க்கும் விவசாயிகள், வியாபாரிகள் பலர் கலந்து கொண்டனர்.