சோமவார்பேட்டை வனப்பகுதியில் வனவிலங்குகளை வேட்டையாட முயற்சி; 5 பேர் கைது 3 துப்பாக்கிகள், கார் பறிமுதல்

குடகு,

குடகு மாவட்டம் சோமவார்பேட்டை தாலுகா பூவங்காலா கிராமத்தையொட்டி உள்ள வனப்பகுதியில் சிலர் வனவிலங்குகளை வேட்டையாடுவதாக வனத்துறையினருக்கு ரகசிய தகவல் கிடைத்தது. அதன்பேரில், வனத்துறை அதிகாரி லட்சுமிகாந்த் தலைமையிலான வனத்துறையினர் பூவங்காலா வனப்பகுதியில் அதிரடி சோதனை நடத்தினார்கள்.

அப்போது வனப்பகுதியில் 5 பேர் வனவிலங்குகளை வேட்டையாடுவதற்காக சுற்றி வந்தது தெரியவந்தது. வனத்துறையினரை பார்த்ததும் அவர்கள் 5 பேரும் தப்பியோட முயன்றனர். ஆனாலும் 5 பேரையும் வனத்துறையினர் சுற்றிவளைத்து பிடித்தனர்.

இதையடுத்து அவர்கள் 5 பேரிடமும் வனத்துறையினர் விசாரணை நடத்தினார்கள். விசாரணையில், சாந்தள்ளி கிராமத்தை சேர்ந்த சங்கப்பா, லத்தேஷ், போப்பையா, உத்தய்யா, தேவராஜ் என்பதும், இவர்கள் புத்தாண்டையொட்டி வனப்பகுதியில் மான் உள்ளிட்ட வனவிலங்குகளை வேட்டையாடுவதற்காக துப்பாக்கிகளுடன் சுற்றித்திரிந்ததும் தெரியவந்தது.

இதையடுத்து அவர்கள் 5 பேரையும் வனத்துறையினர் கைது செய்தனர். அவர்களிடம் இருந்து 3 துப்பாக்கிகள், 6 தோட்டாக்கள், ஒரு கார், 5 செல்போன்கள், கத்தி, அரிவாள் ஆகியவை பறிமுதல் செய்யப்பட்டது. கைதான 5 பேரையும் வனத்துறையினர் சோமவார்பேட்டை கோர்ட்டில் ஆஜர்படுத்தி சிறையில் அடைத்தனர்.