வெவ்வேறு இடங்களில் விபத்து: கல்லூரி மாணவர் உள்பட 2 பேர் பலி

சேலம்,

சேலம் பள்ளப்பட்டியை சேர்ந்தவர் கார்த்திக் (வயது 25). நாமக்கல்லை சேர்ந்தவர் கவின் (23). இவர்கள் இருவரும் நண்பர்கள். கோவையில் உள்ள ஒரு தனியார் கல்லூரியில் படித்து வந்தனர். சரஸ்வதிபூஜை மற்றும் ஆயுதபூஜையை முன்னிட்டு கல்லூரிகளுக்கு 4 நாட்கள் விடுமுறை விடப்பட்டதால் நேற்று அவர்கள் மோட்டார் சைக்கிளில் கோவையில் இருந்து சேலத்திற்கு வந்தனர். அப்போது, கொண்டலாம்பட்டி மேம்பாலம் அருகே வந்தபோது, திடீரென நிலைதடுமாறி கீழே விழுந்தனர். இந்த விபத்தில் படுகாயம் அடைந்த கார்த்திக் சம்பவ இடத்திலேயே பரிதாபமாக உயிரிழந்தார். மேலும், காயம் அடைந்த கவின் சேலத்தில் உள்ள ஒரு தனியார் ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். இது குறித்து அன்னதானப்பட்டி போலீசார் வழக்குப் பதிவு செய்து விசாரணை நடத்தி வருகின்றனர்.

இதேபோல், மேட்டூர் அருகே பெரியசோரகை குள்ளானூர் பகுதியை சேர்ந்தவர் சரவணன் (வயது 32). லாரி டிரைவர். இவர், நேற்று இரவு மோட்டார் சைக்கிளில் சேலம் உருக்காலையில் இருந்து வெளியே வந்தார். அப்போது, உருக்காலை மூன்றாவது கேட்டில் அவரது மோட்டார் சைக்கிள் மோதியது. இந்த விபத்தில் படுகாயம் அடைந்து சம்பவ இடத்திலேயே சரவணன் உயிரிழந்தார். இதுபற்றி தகவல் அறிந்த இரும்பாலை போலீசார் சம்பவ இடத்திற்கு சென்று அவரது உடலை மீட்டு பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். இந்த விபத்து தொடர்பாக போலீசார் விசாரணை நடத்தி வருகின்றனர்.