ராஜீவ்காந்தி பிறந்தநாள்: சிலைக்கு மாலை அணிவித்து நாராயணசாமி மரியாதை

புதுச்சேரி,

புதுவை அரசு சார்பில் முன்னாள் பிரதமர் ராஜீவ்காந்தியின் பிறந்தநாள் விழா நேற்று கொண்டாடப்பட்டது. இதையொட்டி கிழக்கு கடற்கரை சாலையில் உள்ள அவரது உருவசிலை அலங்கரித்து வைக்கப்பட்டிருந்தது.

சிலைக்கு முதல்-அமைச்சர் நாராயணசாமி மாலை அணிவித்து மரியாதை செலுத்தினார். நிகழ்ச்சியில் சபாநாயகர் வைத்திலிங்கம், அமைச்சர்கள் நமச்சிவாயம், கந்தசாமி, ஷாஜகான், கமலக்கண்ணன், துணை சபாநாயகர் சிவக்கொழுந்து, எம்.எல்.ஏ.க் கள் ஜெயமூர்த்தி, விஜயவேணி, தீப்பாய்ந்தான் உள்பட பலர் கலந்துகொண்டனர்.

நிகழ்ச்சியில் சர்வமத பிரார்த்தனையும், தேச பக்தி பாடல்களும் இடம்பெற்றன. அதைத்தொடர்ந்து நாராயணசாமி தலைமையில் ஒருமைப்பாட்டு உறுதிமொழி எடுத்துக்கொள்ளப்பட்டது.

முன்னதாக காங்கிரஸ் கட்சி அலுவலகத்தில் ராஜீவ்காந்தியின் பிறந்தநாள் விழா கொண்டாடப்பட்டது. விழாவுக்கு அமைச்சர் நமச்சிவாயம் தலைமை தாங்கினார். முதல்-அமைச்சர் நாராயணசாமி மற்றும் அமைச்சர்கள், எம்.எல்.ஏ.க்கள் ராஜீவ்காந்தியின் உருவப்படத்துக்கு மரியாதை செலுத்தினார்கள்.

நிகழ்ச்சியில் காங்கிரஸ் நிர்வாகிகள் விநாயகமூர்த்தி, நீல.கங்காதரன், பெத்தபெருமாள், ஏ.கே.டி.ஆறுமுகம், எம்.ஏ.கே.கருணாநிதி, வீரமுத்து உள்பட பலரும் கலந்துகொண்டனர்.

அரியாங்குப்பம் தொகுதி வட்டார காங்கிரஸ் கட்சி சார்பில் ராஜீவ்காந்தி பிறந்தநாள் நிகழ்ச்சி நடைபெற்றது. இதையொட்டி வீராம்பட்டினம் சந்திப்பு பகுதியில் அலங்கரித்து வைக்கப்பட்டிருந்த அவரது உருவ படத்துக்கு மலர்தூவி மரியாதை செலுத்தப்பட்டது.