மங்களூருவில், கால்வாயில் அடித்து செல்லப்பட்ட 2 வாலிபர்களின் உடல்கள் மீட்பு குடும்பத்தினருக்கு மந்திரி யு.டி.காதர் நேரில் ஆறுதல்

மங்களூரு, 

மங்களூருவில், கால்வாயில் அடித்து செல்லப்பட்ட 2 வாலிபர்களின் உடல்கள் மீட்கப்பட்டன. வாலிபர்களின் குடும்பத்தினருக்கு மந்திரி யு.டி.காதர் நேரில் சென்று ஆறுதல் கூறினார்.

தட்சிண கன்னடா மாவட்டம் மங்களூரு அருகே பஜ்பே போலீஸ் எல்லைக்கு உட்பட்ட படுபெராரு கிராமம் மூடுபெராரு பகுதியை சேர்ந்தவர் சந்திரகாஷ் ஷெட்டி(வயது 35). பெர்முடா கிராமத்தை சேர்ந்தவர் திவாகர் கவுடா(32). இந்த நிலையில் நேற்று முன்தினம் இவர்கள் 2 பேரும் அப்பகுதியில் ஓடும் கால்வாயை கடக்க முயன்றனர். அப்போது எதிர்பாராதவிதமாக அவர்கள் 2 பேரும் கால்வாயில் நீரில் அடித்து செல்லப்பட்டனர். இதில் அவர்கள் 2 பேரும் பரிதாபமாக இறந்தனர்.

இந்த நிலையில் கால்வாயில் அடித்து செல்லப்பட்ட 2 வாலிபர்களின் உடல்களையும் தேடும் பணி தீவிரமாக நடந்து வந்தது. நேற்று காலை அவர்கள் 2 பேரின் உடல்களையும் தீயணைப்பு படைவீரர்கள் மீட்டனர். பின்னர் அவர்களின் உடல்கள் பிரேத பரிசோதனைக்காக ஆஸ்பத்திரிக்கு அனுப்பி வைக்கப்பட்டன. பிரேத பரிசோதனை முடிந்ததும் வாலிபர்களின் உடல்கள் உறவினர்களிடம் ஒப்படைக்கப்பட்டது.

இந்த நிலையில் கால்வாயில் அடித்து செல்லப்பட்டு உயிரிழந்த 2 வாலிபர்களின் வீடுகளுக்கும் தட்சிண கன்னடா மாவட்ட பொறுப்பு மந்திரி யு.டி.காதர் சென்றார். அவர் வாலிபர்களின் குடும்பத்தினருக்கு ஆறுதல் கூறினார். இதனையடுத்து மந்திரி யு.டி.காதர் நிருபர்களுக்கு அளித்த பேட்டியில் கூறியதாவது:–

கால்வாயில் அடித்து செல்லப்பட்டு 2 வாலிபர்கள் உயிரிழந்த சம்பவம் மனதிற்கு வேதனை அளிக்கிறது. அவர்களின் குடும்பத்தினருக்கு நான் ஆறுதல் கூறியுள்ளேன். அரசிடம் பேசி உயிரிழந்த 2 வாலிபர்களின் குடும்பத்தினருக்கு தலா ரூ.5 லட்சம் நிவாரணம் பெற்று தர நடவடிக்கை எடுப்பேன்.

இவ்வாறு அவர் கூறினார்.