ரசாயன தொழிற்சாலை விரிவாக்கத்துக்கு அனுமதி தரவில்லை அமைச்சர் கந்தசாமி திட்டவட்டம்

புதுச்சேரி,


புதுவை சட்டசபையில் அ.தி.மு.க. எம்.எல்.ஏ. வையாபுரி மணிகண்டன் எழுப்பிய கேள்வியை தொடர்ந்து நடந்த விவாதம் வருமாறு:-


வையாபுரி மணிகண்டன்: காலாப்பட்டில் உள்ள தனியார் ரசாயன தொழிற்சாலை விரிவாக்கத்துக்கு அனுமதி தர அரசுக்கு எண்ணம் உண்டா?

அமைச்சர் கந்தசாமி: ஸ்டிராட்ஸ் சாசன் டிரக்ஸ் நிறுவனம் தொழிற்சாலை விரிவாக்கத்துக்கு புதுச்சேரி மாசு கட்டுப்பாட்டு குழுமத்திடம் அனுமதிகோரி விண்ணப்பித்துள்ளது. அது பரிசீலனையில் உள்ளது. சுற்றுச்சூழல் தொடர்பாக நிறைய புகார்கள் வந்துள்ளன.

அன்பழகன்: அமைச்சருக்கு தெரியாமல் கருத்துகேட்பு கூட்டம் நடத்த கலெக்டர் எப்படி அறிவிப்பு வெளியிட்டார்?

அமைச்சர் கந்தசாமி: மத்திய அரசு மக்களிடம் கருத்துகேட்க கூறியுள்ளது.



அசோக் ஆனந்து: அந்த தொழிற்சாலை கழிவுகளில் 7 விதமான நச்சுத்தன்மை உள்ளது.

தீப்பாய்ந்தான்: சேதராப்பட்டிலும் இதேபோல் நிறைய தொழிற்சாலைகள் உள்ளன.

அமைச்சர் நமச்சிவாயம்: இந்த தொழிற்சாலைக்கு எப்போது அனுமதி கொடுக்கப்பட்டது? கடந்த 2 வருடத்துக்கு முன்பு அங்கிருந்து வெளியேற்றப்பட்ட கழிவுகளில் நச்சுத்தன்மை இல்லையா?

அமைச்சர் கந்தசாமி: அந்த தொழிற்சாலை விரிவாக்கத்துக்கு புதுவை அரசு அனுமதி ஏதும் தரவில்லை.

இவ்வாறு விவாதம் நடந்தது.