பராமரிப்பு பணிகளை மேற்கொள்ள மின் இணைப்பு வழங்கக்கோரி ஸ்டெர்லைட் நிறுவனம் மனு தாக்கல்

மதுரை,

தூத்துக்குடி ஸ்டெர்லைட் ஆலையின் பொதுமேலாளர் (சட்டம்) சத்யப்பிரியா, மதுரை ஐகோர்ட்டில் தாக்கல் செய்த மனுவில் கூறியிருந்ததாவது:–

ஸ்டெர்லைட் ஆலை கடந்த 24 ஆண்டுகளாக சட்ட விதிமுறைகளை பின்பற்றி இயக்கப்பட்டு வருகிறது. இந்த ஆலையின் 2–வது யூனிட் விரிவாக்க பணிகள் சமீபத்தில் நடந்து வந்தன. அப்போது அதற்கு தடை விதிக்க வேண்டும் என்றும், ஆலையை நிரந்தரமாக மூட வேண்டும் என்றும் அப்பகுதி மக்கள் தொடர் போராட்டத்தில் ஈடுபட்டனர்.

இதன்விளைவாக ஸ்டெர்லைட் ஆலை படிப்படியாக மூடப்படும் என்று தமிழக முதல்–அமைச்சர் அறிவித்தார். மேலும் தமிழ்நாடு மாசுக்கட்டுப்பாட்டு வாரியம் சார்பில் புதுப்பித்தல் சான்றிதழ் வழங்கப்படவில்லை. மின் இணைப்பும் துண்டிக்கப்பட்டது. தற்போது ஆலை மூடப்பட்டு உள்ளதால் பராமரிப்பு இன்றி கிடக்கிறது.

இந்த நிலையில் கடந்த 16–ந் தேதி ஆலையில் அமைக்கப்பட்டுள்ள கந்தக அமிலம் செல்லும் குழாயில் கசிவு ஏற்பட்டது. அப்போது இரவு நேரம் என்பதாலும், மின் இணைப்பு இல்லாததாலும் உரிய நேரத்துக்கு சென்று குழாயில் ஏற்பட்ட கசிவை தடுக்க முடியவில்லை.

இதேபோல எல்.பி.ஜி. கியாஸ் மற்றும் எளிதில் தீப்பற்றக்கூடிய பொருட்கள் ஏராளமாக உள்ளன. தொடர்ந்து இவற்றை பராமரிக்காமல் வைத்திருந்தால் குழாய்களில் கசிவோ, வேறு ஏதேனும் ஆபத்துகளோ ஏற்படுவதற்கு வாய்ப்புகள் உள்ளன. அவ்வாறு விபத்துகள் நடந்தால் தொழிற்சாலையை சுற்றி உள்ள கிராமங்களில் வசிக்கும் மக்களுக்கு பாதிப்புகள் ஏற்படும்.

எனவே கழிவுகளை அகற்றவும், பராமரிப்பு பணிகளை மேற்கொள்ளவும் ஸ்டெர்லைட் ஆலைக்குள் குறிப்பிட்ட பணியாளர்களை போலீஸ் பாதுகாப்புடன் அனுப்பவும், தற்காலிகமாக மின் இணைப்பு வழங்கவும் உத்தரவிட வேண்டும்.

இவ்வாறு அவர் மனுவில் கூறியிருக்கிறார்.

இந்த மனு விரைவில் விசாரணைக்கு வர உள்ளது.